کوئٹہ۔ 10 دسمبر (اے پی پی) چیف جسٹس پاکستان میاں ثاقب نثار دوشنبے نادے کوئٹہ ٹی سپریم کورٹ رجسٹری نا پوسکن آ ماڑی نا بناءِ کرے۔ داوخت آ عدالت عظمیٰ نا جج جسٹس گلزار احمد و جسٹس آصف سعید کھوسہ ، چیف جسٹس بلوچستان ہائی کورٹ سیدہ طاہرہ صفدر و سینئر وکیل آک ہم ساڑی ئسر۔ سپریم کورٹ کوئٹہ رجسٹری نا ڈیزین و جوڑ کننگ نا کاریم تا بابت پنی آ ارکیٹیکٹ نیر علی داداچیف جسٹس ءِ احوال تس۔ بنائی دود آن تران اٹی چیف جسٹس پارے کہ بیرہ ماڑی نا جوڑ کننگ المی اف، ننا مسخت راج اٹی عدل و انصاف نا فراوانی ءِ المی جوڑ کننگ نا ءِ انتئے کہ انصاف نا بنداو آ راج آک جوڑ مریرہ و انصاف ہر راج اکن بے کچ المی ءِ، اوسپریم کورٹ کوئٹہ رجسٹری نا پوسکن آ ماڑی نا ڈٹ انا پوروی آ است جمی نا درشانی ءِ کرسا پارے کہ غٹ انا کوشست آتیان دا ڈٹ ایسری اسکان سرمس و دعا ءِ کہ داکان الس ءِ دمدستی و اڑزان انصاف نا فراوانی مننگ کے، اودااومیت نا درشانی ءِ کرے کہ دااسہ ہندن ءُ ماڑی اس مریک ہراڑے انصاف نا بول بالا مریک و سائل آتے دمدستی انصاف تننگ مریک۔
