عمران خان نا سرکڑدہ ہی ملک انا سمت ءِ سہی کرینے، اولیکو وار حکومت اس الس نا فائدہ غاتے مون آ تخسا پالیسی جوڑ کرے
ہری پور۔ 03دسمبر (اے پی پی) بنجائی وزیر توانائی عمر ایوب خان پارینے کہ وزیراعظم عمران خان نا بے مٹ سرکڑدہ ہی ملک انا سمت ءِ سہی کرینے، اولیکو وار حکومت اس الس نا فائدہ غاتے مون آتخسا پالیسی جوڑ کرے، 100 دے اٹی چندی بشخ آتا اصلاحاتی ایجنڈا غا سنجیدگی اٹ کاریم کرینے۔ او تدوک آ شام غازی ٹی واقع تینا دفتر اٹی پریس کانفرنس آن تران کریکہ۔ اوپارے کہ داوخت آ ننے غٹ آن بھلا ویل مون تروک ءِ او گردشی وام تا ءِ ہرا 1300 ارب روپئی نا بڑزکو انگاکہول آ سرمسنے، پشاور الیکٹرک سپلائی کمپنی (پیسکو) نا کم و ود بھٹہ توسنے ، داسال اسہ اندازہ سے نا رداٹ دانا نسخان 65ارب نا خڑک مریک، پیسکو ءِ ہر تُو کم و ود چار آن پنچ ارب تواٹی نسخان مننگ ءِ ، داچرجوئی ٹی بے کچ است ہسونی اٹ پاروئی تمک کہ پشاور نا نواحی علاقہ بنوں و ڈیرہ اسماعیل خان اٹی کنڈہ کلچر و لین لاسز نا سوب آن 90 آن 98 درسد اسکان نسخان مننگ ءِ ، دابابت زوت منظم و گچین ءُ وڑوڈول اسے اٹ زوت کارروائی نا بناءِ کننگ انگ ءِ۔ اوپارے کہ صدر مملکت و وزیراعلیٰ خیبر پختونخواتون اونا اوڑدہی مسنے، غٹ آن مست محکمہ ٹی داساڑی مون اِنگا میل تا برخلاف سخت کارروائی کننگک ہرا کنڈہ کلچر ءِ مون آ دننگ اٹ کمک کننگ ءِ، داڑتون اوار ہی بجلی دُزی کروک آتا برخلاف ہم سخت کارروائی کننگک، ننے دا کارروائی ٹیی انٹیلی جنس ادارہ و کانود نافذ کروک آ ادارہ غاتا کمک دوئی مریک۔ عمر ایوب خان اسہ سوج اسے نا ورندی ٹی پارے کہ ننے خیبر پختونخوا ٹی فورس لوڈشیڈنگ کروئی تمنگ ءِ، اگہ دُن کپن تو لین لاسز نا صورت اٹ پیسکو ءِ پین نسخان سگوئی تمک۔ بنجائی وزیر داوخت آ جتا سوج آتا ورندی ءِ ترسا پارے کہ بروک آ ہفتہ تربیلا نا پنچ می ودکی ڈٹ انا زموار آتون دیوان اس مریک ہراٹی ہندی ورناتا اولیت بنداو تیا بھرتی نا بابت پارت تننگک وخت اس کہ ضلع ہری پور نا الس کن پوسکن آ آسراتی تیان آراستہ ہسپتال و میڈیکل کالج آتا جوڑ کننگ ءِ ہم عمل اٹ اتنگک۔
