اسلام آباد۔ 02نومبر (اے پی پی) بنجائی وزیر امور کشمیر و گلگت بلتستان علی امین خان گنڈاپور تون پاکستان اٹی فرانس نا سفیر ڈاکٹر مارک بریٹی اسلام آباد اٹی اوڑدہی کرے۔ اوڑدہی ٹی ہڑتوم آ ملک آتا ہڑتوم آ کنڈآتا تعلقداری خاص کر آزاد جموں و کشمیر و گلگت بلتستان اٹی معاشی و راجی بشخ آتا شونداری نا بابت ہیت وگپ کننگا۔ داوخت آ بنجائی وزیر پارے کہ پاکستان و فرانس نا نیام اٹ گچین دوستانہ تعلقداری ءِ ہرا وخت انا گدرینگ انگ تون پین سوگو مننگ ءِ۔ اوڑدہی ٹی تینا حکومت نا اولیت آتا ذکر ءِ کرسا بنجائی وزیر پارے کہ وزیراعظم عمران خان معاشی و راجی بشخ آتا شونداری نا کمک اٹ پاکستان ءِ اسہ شونہال ءُ ملک اس جوڑ کننگ نا وژن نا بابت پرعزم ءِ۔ آزاد کشمیر و گلگت بلتستان اٹی سیل وسوات و معدنیات نا بشخ آتا لائخی تے تالان کرسا بنجائی وزیر فرانسیسی سفیر تون دا بشخ آتا شونداری نا بابت جتا ڈٹ بندی نا ہم ذکر ءِ کرے۔ اوپارے کہ حکومت داعلاقہ غاتے ٹی سیل و سوات نا کچ ءِ ودفنگ کن پوسکن آ سیل وسواتی ہند، رابطہ روڈ و تفریحی سرجزآتے ودفنگ نا ارادہ تخک و اوڑتون اوار درملکی سیل و سواتی ، کوہ پیماو ٹریکرز آتے کن ویزا پالیسی ، سیکورٹی و ریسکیو سروس آتے پین گچین جوڑ کننگ انگ ءِ۔
