اسلام آباد۔ 01 نومبر (اے پی پی) پاکستان ریلوے نسخان نا مون ءِ توننگ کن حکومت نا اولیکو بنائی سد دے انا تہٹی 10آن 15 مال بردار ٹرین چلیفنگ کن بست و بند آتے پورو کرے۔ وزیر ریلوے شیخ رشید احمد مال بردار ٹرین چلیفنگ و کاروباراٹی گچینی کن ٹاسک فورس اس ہم جوڑ کرینے۔ وزارت ریلوے نا ذرائع ’’اے پی پی‘‘ ءِ پارے کہ ریلوے ءِ کٹیا کروک ادارہ اس جوڑ کننگ و مسافر آتا آسراتی کن چندی گام گیج آتے چست کننگانے و ٹریکنگ سسٹم نا تنصیب ہم آخیریکو مرحلہ غاتے ٹی ءِ۔ اوفک پاریر کہ ریلوے کالونی تے واپڈ نا حوالہ کننگک تانکہ بجلی نا مد اٹی مروک آ خڑچ آتے ٹی کمتی اتنگ مرے۔ اومستی پارے کہ پاکستان ریلوے پاکستان فریٹ ٹرانسپورٹیشن تون معاہدہ ہم کرینے۔ دامعاہدہ نا رداٹ ہردے 12ہزار میٹرک ٹن کولا نا نقل و حمل مننگ کیک ہراڑآن کول پاور پلانٹ کن کولا ہم دستیا ب مننگ کیک۔ اوفک پاریر کہ جامشورو پاور پلانٹ کن ہم دا معاہدہ غان پد 34لکھ5ہزار میٹرک ٹن کولا نا ماہانہ نقل و حمل مریک۔ اوفک پاریر کہ پاکستان ریلوے مال برداری کن پاکستان اسٹیٹ آئل (پی ایس او) تون ہم معاہدہ کرینے ہرانا رداٹ سالانہ 2لکھ ملین ٹن پٹرولیم مصنوعات آتا نقل و حمل مننگ کیک۔
