اسلام آباد۔ 27 ستمبر (اے پی پی) وزیر مملکت داخلہ شہریار آفریدی پارینے کہ چناتا برمتہ ، چناتا حق انا پامالی و چناتا شرحالی کن اولیتی بنداو تیا کانود سازی کننگک، چائلڈ پور نو گرافی نا بابت پاکستان ءِ جہانی کہول آ بدنام کننگ انگ ءِ، نن پاکستان نا آئین و کانود و غٹ کڑدہ غاتا سلابت اٹ گچین گام گیج چست کینہ۔ پنچ شنبے نادے قومی اسمبلی ٹی کراچی ٹی چناتا برمتہ نا ودوک آ واقعہ غاتیا صائمہ ندیم ، غزالہ سیفی، آفتاب جہانگیر و سیف الرحمان نا چکاری نوٹس آ وزیر مملکت داخلہ شہریار آفریدی پارے کہ کراچی نا واقعہ است ہسون ءِ ، کنا است خواہی ئس کہ اپوزیشن ساڑی مسکہ تو نن داڑآ گچین وڑاٹ ہیت کرینہ و بنگونہ ای کراچی و سندھ آ کاوہ۔ وزیراعظم ہم دابابت پارت تسنے۔ پاکستان نا چین اتون ہرا گوازی مسنے او است ہسونی اسے۔ اوپارے کہ دا ایوان نا مسخت دائس کہ اسہ ایلو آ دوبہ خلنگپ بلکن السی حق اکن کانود جوڑ کننگے۔ ای اسہ باوہ سے اٹ ، داڑے چناتا فحش فلم جوڑ مننگ ءِ ہراانسانیت نا دنگ آن پیشن ءُ۔ اوپارے کہ کراچی نا واقعہ ٹی تھانہ نا ایس ایچ او زموار ءِ، ہراتم او ایس ایچ او داایوان اٹ تولوک خلقت نا چہیتا مرے دا پارلیمان آ لس پاکستانی سوج ہرفک۔ بلال کالونی ٹی شش سال انا چنانا گمشدگی نا رپورٹ بس۔ رپورٹ آن پد جاست وپاست کریر تو معلوم مس کہ اِرا بندغ چناءِ برمتہ کرینو درینو۔ وزیر داخلہ پارے کہ کاش بلاول و پیپلزپارٹی نا خلقت کنا ہیت ءِ خفتوریرہ ، اوپارے کہ بدقسمتی اٹ پولیس و کانود ءِ گچین جوڑ کننگ آ چکار کننگتو، قصور و مردان واقعہ غاتیان پد ہراتم عدالت عظمیٰ تینٹ نوٹس ہلک تو قوم سماکیک، ہمو ادارہ ہرادے داوڑنا واقعہ غاتا توننگ کن تنخواہ تننگک او تینا کاریم ءِ کپک۔ وزارت داخلہ غٹ اکائی تا نمائندہ غاتون تولسا کریمنل جسٹس سسٹم و ایلو معاملہ غاتیا اسیجا کانودی سازی کیک۔ اوپارے کہ ای اپوزیشن لیڈر و بلاول بھٹو زرداری آن ہم خواست کیوہ کہ او ہم دا معاملہ غا ننا کمک ءِ کے۔
