نیویارک۔ 12 ستمبر (اے پی پی) اقوام متحدہ متنبہ کرینے کہ موسمیاتی شدت نا سوب مچ آ دنیا ٹی بین ودنگ ءِ۔ اقوام متحدہ نا اہم ادارہ غاتا سالانہ رپورٹ اٹی پاننگانے کہ جھیڑہ و موسمیاتی شدت نا سوب مچ آ دنیا ٹی پدریسہ مسہ سال آن بین زیات مننگ ءِ ہرانا سوب 2030 ء اسکان بین آن دنیا ءِ بچفنگ نا کوشست آک ہم شدید خطرہ غاتا گواچی مننگ ءُ ۔ رپورٹ نا رداٹ 2017 ء ٹی خور آن محرومی نا گواچی بندغ آتا کچ ودسا 82 کروڑ 10 لکھ مس ہرا 2016ء ٹی 80 کروڑ 40 لکھ ئس۔ دارپورٹ ءِ جاری کروک آ اقوام متحدہ نا ادارہ غاتے ٹی جہانی ادارہ خور و کشت وکشار ، کشاری شونداری نا جہانی ادارہ، ورلڈ فوڈ پروگرام، یونیسیف و جہانی ادارہ جان جوڑی اوار ءُ۔ ورلڈ فوڈ پروگرام نا سروک ڈیوڈ بیسلی رپورٹ اٹی امنا کرینے کہ مچ آ دنیا ٹی جھیڑہ و موسمیاتی شدت نا سوب بین و غذائی کاختی ٹی ودکی مننگ ءِ ۔ خور و کشت و کشار نا جہانی ادارہ نا سینئر اقتصادی چاہندار سینڈی ہولمن ہم پارینے کہ مسہ سال اٹی مچ آ دنیا ٹی خور انا کاختی یا بین اٹی ودکی مسنے۔ رپورٹ اٹی مستی پاننگانے کہ چندی حکومت آک بین نا مون ءِ توننگ و خور انا کمتی ءِ مر کننگ اٹ سرسہب ہم مسنو ولے اونا باوجود دارداٹ پین دمدستی گام گیج نا گرج ءِ ایلو دروشم اٹ دنیا ءِ 2030 ء اسکان بین آن نجات تفننگ نا بابت پائیدار شونداری نا ہدف آتے دوئی کننگ مفک۔
