اسلام آباد۔ 23جولائی (اے پی پی) پاکستان وژن 2025ء نا رداٹ ورنانسل ءِ تعلیمی انقلاب نا کمک اٹ گچین آخبت آن ہمکنار کننگ بنجائی حکومت نا اولی مشن ءِ ، حکومت ہندی کہول آ بڑزکو تعلیمی ادارہ غاتا اسہ نیٹ ورک اس جوڑ کرسا السی آسراتی تیٹی ودکی نا کسرآ روان ءِ، وژن 2025ء ٹی تعلیمی شون ءِ اولی حیثیت تننگانے و پاکستان نا غٹ ضلع غاتا کہول آ سب کیمپ آتا جوڑ کننگ علاقائی شونداری نا کسر آ اسہ اہم ءُ گام گیج اس جوڑ مریک ، مچ آ ملک اٹی تعلیم نا بشخ ءِ گچین جوڑ کننگ کن اینخو مالی سال نا پی ایس ڈی پی نا رداٹ ہائر ایجوکیشن کمیشن کن 45ارب 66کروڑ روپئی بجٹ اٹی جتا کرینے۔ پلاننگ کمیشن نا کمامدارآک’’اے پی پی‘‘ ءِ پاریر کہ ہر ملک انا شونداری ٹی خواندگی بھاز اہمیت تخک ولے تعلیم آن بیدس شونداری مننگ کپک ، وژن 2025ء نا رداٹ تعلیم نا بشخ اکن حکومت خصوصی گام گیج کرینے، ورناک سویلی ایشیا نا جوڑ جاڑ و شونداری کن مثالی و کاریمی کڑد ادا کیرہ۔ معاشی سوگوی ٹی اوفتا گچین ءُ رول اس مریک و بروک آ وخت اٹی ورنانسل سلہہ آخا بلکن قوم تا شونداری کن انقلاب اس اتیرہ۔ وزارت نا ذرائع پارے کہ وژن 2025ء نا رداٹ حکومت ملک آن ناخواندگی ءِ چٹفنگ کن ہر وڑکوشست کننگ ءِ ۔ و ہندا رداٹ حکومت وژن 2025ء نا رداٹ اسکول آ ہنوک آ چناتا تعدادی پرخ ءِ چٹفنگ کن حکومت کوشست کننگ ءِ و بروک آ پنچ سال اٹی داپرخ اٹی 50 درسد اسکان کمتی اتنگک و 2025ء اسکان ہر چناتعلیم نا زیورآن آراستہ مریک۔ اوفک پاریر کہ حکومت قومی وسیلہ غاتے الس نا شرحالی و ملکی شونداری کن کاریم اٹ اتنگ کن حقیقت پسندانہ حکمت عملی اس اختیار کننگ ءِ ہرانا بھرمک ترندی اٹ مون آ بننگ نا بناءِ کرینو۔ اوپاریر کہ پٹ و پول نا پوسکن آ پروجیکٹ جوڑ کرین ہراڑآن ننا جی ڈی پی گچین مرے و ملک معاشی وڑاٹ تینا نت تیا سلنگ کے۔ بنجائی وایلو صوبائی حکومت آک خواندگی نا چرجوئی ٹی سنجیدہ ءُ و تینا وسیلہ غاتا اسہ چارک آن ہم زیات داڑآ خڑچ کننگ ءُ۔
