اسلام آباد۔ 23جولائی (اے پی پی) حج انا فرض ءِ ادا کننگ کن بلوچستان آن تعلق تخوک آ حاجی تے حج مبارک آ سرکننگ کن فلائٹ آپریشن پنچ شنبے نادے 26جولائی آن بناء کیک۔ وزارت مذہبی امور نا ذرائع نا پاننگ ءِ کہ بلوچستان نا حاجی تے حج مبارک آ سرکننگ نا زمواری شاہین انٹرنیشنل ءِ تننگاسس ولے شاہین انٹرنیشنل نا حج آپریشن آن پیشن مننگ نا بناء آ بلوچستان نا 4ہزار 733حاجی تے پی آئی اے و ایئر بلیو نا کمک اٹ حج مبارک آ سرکننگ نا بست و بند کننگانے۔ وزارت نا کوشست آتیان بلوچستان آن تعلق تخوک آ حاجی تے داسہ کوئٹہ آن حج انا فرض انا ادا کننگ کن حج مبارک آ رادہ کننگک۔ مہالو دا فیصلہ مسوسس کہ بلوچستان نا حاجی تے ملتان و کراچی بذریعہ ایئر لائن سرکننگک ہراکان اوفتے حج مبارک آ رادہ کننگک ولے داسہ حاجی تے کوئٹہ آن ہی جہاز تننگانے ہرافتا کمک اٹ او براہ راست حج مبارک آ رادہ مریرہ۔
