اسلام آباد۔ 29 مئی (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) نا حکومت 2013 ء ٹی میرات اٹی ملوک آ بجلی نا شدید تنکی نا سرسہبی اٹ مون ءِ تورینے، نیشنل گریڈ اٹی 11 ہزار 461میگاواٹ بجلی اوار کرے، نواز شریف نا کماشی ٹی ننا جماعت دا ویل ءِ ایسر کننگ نا وعدہ کریسس و گدرینگوک آ پنچ سال اٹی گچین گام گیج ہرفسا دا ناممکن چیلنج ءِ پورو کرسا نشان تس۔ داخیال آتا درشانی ءِ او سے شنبے نادے وزیراعظم ہاؤس اٹی توانائی نا بابت پریس کانفرنس آن تران کرسا کرے۔ داوخت آ بنجائی وزیر اطلاعات و نشریات مریم اورنگزیب و پاور ڈویژن نا بنجائی وزیر اویس احمدلغاری ئسک ہم ساڑی ئسر۔ وزیراعظم پارے کہ ساڑی آ حکومت 2013ء ٹی اقتدار ءِ سنبھالا تو 18 ہزار 753 میگاواٹ بجلی نا کچ ئس ہرا داسہ 2018 ء ٹی 28 ہزار 704 میگاواٹ ءِ ، ہراٹی پن بجلی، تیل ، گیس ، آر ایل این جی ، کولا، جوہری و قابل تجدید توانائی آن دوئی مروک آ بجلی اوار ءِ۔ اوپارے کہ نن قومی گریڈ اٹی 10 ہزار میگاواٹ ودکی بجلی اوار کرین۔ وزیراعظم پارے کہ 28 ہزار 704 آن گڑاس ہائیڈل پاور ءُ ہرا ہر وخت دستیاب مفک ، گرج انارداٹ چندی ذریعہ غاتے کاریم اٹ اتنگک۔ اپریل 2018 ء ٹی 17180 میگاواٹ پیداوار ئس وخت اس کہ جولائی 2013ء ٹی 16 ہزار 170میگاواٹ و اپریل 2013 ء ٹی 11 ہزار 738 بجلی ودی مسکہ۔ اوپارے کہ 2018 ء ٹی کم و ود 6 ہزار میگاواٹ زیات بجلی ودی مننگ ءِ۔ وزیراعظم پارے کہ ساڑی آ حکومت قومی نظام اٹی 11 ہزار 461میگاواٹ بجلی اوار کرے۔ اوپارے کہ پنچ سال انا وخت اٹی بجلی نا پیداوار اٹی نمان ودکی مس ولے داڑتون اوار اوار طلب اٹی ہم ودکی مننگ ءِ۔ اوپارے کہ کل افطار اٹی بجلی نا طلب 24ہزار 800میگاواٹ ئس ہرا ریکارڈ اسے۔ وزیراعظم بجلی نا یونٹ پیداوار نا سرجم آتے بیان کرسا پارے کہ مئی 2013 ء ٹی دا پیداوار 75 ہزار ارب کلو واٹ آور ئس و جولائی ٹی دا 9.913 ارب کلوواٹ آور ئس وخت اس کہ 2018 ء ٹی بجلی نا یونٹ پیداوار پونے 5 ارب کلوواٹ آور نا ودکی اتون ودسا 11.9ارب کلو واٹ آور مس و جولائی ٹی 14.6 ارب کلو واٹ آور اسکان سرمننگ نا گمان ءِ، دا پنچ سال اٹی اصل یونٹ پیداوار نا بابت بے مثال ءِ۔
