سی پیک انا رداٹ اسیجائی کاروباری ماڈل، اسکل ڈویلپمنٹ و کاروباری بندغ آتا تین پہ تین رابطہ ءِ مون آ دننگ انگ ءِ، ڈٹ آتا پوروی آن روزگار نالکھ آ وارخواہی دوبریک
اسلام آباد۔ 14مئی (اے پی پی) پاکستان اٹی اقتصادی و صنعتی شونداری کن پاک چین اقتصادی راہداری (سی پیک) نا رداٹ اسیجائی کاروباری ماڈل تون اوار اوار اسکل ڈویلپمنٹ و کاروباری بندغ آتا تین پہ تین رابطہ غاتے مون آ دننگ انگ ءِ، سی پیک نا رداٹ انفراسٹرکچر ، توانائی، اقتصادی زون تا جوڑ کننگ تون اوار چندی ڈٹ آتا پوروی آن پاکستان نئے بیرہ پائیدار شونداری نا دوئی کننگ اٹ سرسہب مریک بلکن لکھ آ ورناتے روزگار نا وارخواہی دوبریک و الس نا راجی شرحالی ہم المی مریک، منفی تاثرآتا چٹفنگ و ڈٹ انا بارواٹ گچین معلومداری نا رداٹ ذرائع ابلاغ نا کڑد بھاز اہمیت تخک۔داخیال آتا درشانی ءِ پروجیکٹ ڈائریکٹر سی پیک حسان داؤد بٹ سے شنبے نادے داڑے ایسوسی ایٹڈ پریس آف پاکستان نا کنڈآن خبررساں ادارہ غاتا جہانی کانفرنس آن تران اٹی کرے۔ اِرادے ئی جہانی کانفرنس نا سرحال ’’پاکستان نا میڈیا: وارخواہی و چیلنج‘‘ ءِ ، ہراٹی چین ، ترکی، سعودی عرب، ایران ، انڈونیشیا ، قطر تون اوار 18 ملک آتا مندوبین آک بشخ ہلکر و ذرائع ابلاغ نا پڑ اٹ مون تروک چیلنج و اوفتے تون مون تننگ نا حکمت عملی آ سجفیر۔ حسان داؤد بٹ داوخت آ سی پیک ڈٹ انا بابت سرجم احوال تس۔ اونا پاننگ ئس کہ سی پیک نا رداٹ توانائی، شاہراہ و گوادر بندرگاہ ءِ شون تننگ نا ڈٹ آتیا ترند رفتاری اٹ کاریم برجاءِ۔ دا ڈٹ تینا تخوک آ وخت اٹی پورو مننگ ءُ ، داڈٹ آتا پوروی آن پاکستان نامعیشت نا کسر اٹی بروک آاڑاند آتے مر کننگ اٹ بھلو حد اسسکان سرسہبی دوئی مریک۔ اونا پاننگ ئس کہ سی پیک نا رداٹ جاری پاکستان و چین نا کمک صنعتی شونداری نا مرحلہ غاتے ٹی پترینگانے۔ دامرحلہ ٹی نئے بیرہ چین بلکن ڈیہہ نا غٹ ملک آک پبی بشخ ہلنگ کیرہ۔ پاکستان سی پیک نا رداٹ جوڑ کروک آ خصوصی اکنامک زون تیٹی زرکاری کن بے کچ لبرل پالیسی اس جوڑ کرینے و داکمکاری نا بنداوی مسخت جائنٹ و وینچرز ءِ مون آ دروئی ءِ تانکہ پاکستانی صنعت آتا پیداواری لائخی تیٹی ودکی کننگ مرے و ہندا بشخ انا سوب پاکستان نئے بیرہ پائیدار شونداری نا دوئی کننگ اٹ سرسہب مریک بلکن داڑے لکھ آ ورناتے روزگار نا وارخواہی دوبریک۔ اوپارے کہ گدرینگوک آ چار سال اٹی سی پیک آن معاشی کساد بازاری نا چٹفنگ، پائیدار شونداری ہدف آتا دوئی کننگ اٹ کمک رسینگانے۔ اوپارے کہ بیلٹ اینڈ روڈ انا کمک اٹ چین، سنٹرل ایشیا، سویلی ایشیا ءِ گنڈنگک۔ دامعاشی شونداری ناکسر ءِ و پاکستان دانا بنجاءِ۔ اوپارے کہ سی پیک اسہ گیم چینجر ءُ ڈٹ اسے، ہراڑآن ڈیہہ نا 3ارب خلقت فائدہ ہرفرہ۔ اوپارے کہ سی پیک اٹی مروک آ کل زرکاری نا 80 درسد توانائی نا بشخ اٹی ءِ، سی پیک نا سوب توانائی نا بشخ اٹی پاکستان نا تاریخ نا غٹ آن بھلا زرکاری 35ارب ڈالر کننگانے۔ توانائی ڈٹ آتا سوب الس ءِ بجلی ملک ۔ اوپارے کہ سی پیک نا مون نا مرحلہ ٹی صنعتی بشخ اٹ کمکاری آن پاکستان سویلی ایشیا ء ٹی صنعتی پیداوار نا بنجا جوڑ مرسا مون آ بریک۔ اوپارے کہ چین اتون اسٹریٹجک تعلقداری معاشی تعلقداری تیٹی بدل مسنے۔ اوپارے کہ سی پیک ڈٹ آتے ٹی روڈز اپ گریڈیشن ، ریل ، ایوی ایشن انفراسٹرکچر ، گوادر بندرگاہ ، خصوصی اقتصادی زون تا جوڑ کننگ کون آ کیہی ڈٹ آتیا کاریم مننگ ءِ ۔ اوپارے کہ سی پیک نا بنائی ڈٹ 2017-18 ء ٹی پورو مریک وخت اس کہ نیام مدتی ڈٹ 2020 ء آن ہلیس 2025 ء اسکان و مریس وختی ڈٹ 2020 ء آن ہلیس 2030 ء اسکان پورومریک۔ اوپارے کہ تھرکول، پن بجلی و متبادل توانائی نا کمک اٹ ہڑزآن چاگڑد دوست بجلی نا ڈٹ آتیا ترندی اٹ کاریم مننگ ءِ، ہرافتے ٹی کیہی ڈٹ آتیان دسمبر 2018 ء اسکان پیداوار بناء کیک وملک اٹی توانائی نا تنکی نا مون ءِ توننگک۔ سوج و ورندی نا نشست اٹی حسان داؤد بٹ سی پیک نا بابت ذرائع ابلاغ نا کڑد ءِ مون آ تخسا پارے کہ سی پیک نا بارواٹ الس ءِ سہی معلومداری فراوان کننگ المی ءِ تانکہ دابارواٹ خننگوک آ گڑاس منفی تاثرآتا ازالہ مرے۔ اوپارے کہ کانفرنس اٹی شریک درملکی مندوبین آک ڈیہہ نا ودکی مفاد نا حامل دا میگاپروجیکٹ نا بارواٹ تینا الس ءِ گچین معلومداری نا رداٹ بھاز کمکار کڑد ادا کننگ کیرہ۔ اوپارے کہ سی پیک نا ڈٹ آتے ٹی زرکاری نا بھاز زیات وارخواہی ساڑی ارے ہرافتیان فائدہ ہرفسا ڈیہہ نا شونداری و شونہالی ءِ مون آ دننگ مریک۔ اسہ سوج اسے نا ورندی ٹی اوپارے کہ سی پیک نا بابت معلومداری پلاننگ کمیشن نا ویب سائٹ آ ساڑی ارے و سی پیک نا رداٹ توانائی، انفراسٹرکچر تون اوار 2030 ء اسکان اخس کہ ڈٹ جات ءُ، اوفتا بارواٹ ہم سرجم دستیاب ءِ۔
