اسلام آباد۔3جولائی (اے پی پی): منصوبہ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءِ سروکی ءَ آبادی ءِ بندوبست ءِ ھوالگ ءَ مزنیں تک ءِ دیوان برجم دارگ بوت کہ ایشی ءِ تہ ءَ آبادی ءِ جیڈھ ءَ را ’’راجی ایمرجنسی‘‘ لیک اتگ ءُ زوت ءُ یکجاھیں راجی حکمت عملی ءِ ضلورت ءِ سر ءَ زور پر داتگ۔ وزیر منصوبہ بندی ءَ گوشت کہ آبادی ءِ منصوبہ بندی یک مردم ءِ زند ءِ ہر تک ءُ پھنات ءَ را متاثر کنت، جان سلامتی، وانگ ءُ زانگ، روزگار، ہر چیز ءِ سیادی گوں ھاندان ءِ کساس ءَ انت۔ آئی ءَ گوشت کہ پاکستان دگنیا ءِ تہ ءَ پنچمی آبادی ءِ ملک جوڑ بوتگ، ایشی ءِ تہ ءَ 80درسد آبادی چہ 40سال ءَ کم ءُ 66درسد 30سال ءَ چہ کم انت۔ آئی ءَ اے اعداد ءُ شمار ءَ را ”ترسناکیں“ لیک اتگ ءُ وفاقی حکومت ءُ صوبہ آنی نیام ءَ نزیکیں کمک ءِ ضلورت ءِ سر ءَ زور پر داتگ۔ گند ءُ نند ءَ راجی جان سلامتی ءِ وفاقی وزیر مصطفیٰ کمال، مذہبی امور ءِ وفاقی وزیر سردار محمد یوسف، وفاقی وزیر ءِ اطلاعات ءُ شنگکاری عطا اللہ تارڑ، سینیٹر روبینا خالد، سینیٹر شیری رحمان (آن لائن)، بی آئی ایس پی ءِ چیئرپرسن ورلڈ ءُ پوگن کونسل، اقوام متحدہ ءِ نمائندگاں بہر زرتگ۔ وزارت منصوبہ بندی، سوشل سیکٹر ءِ باسک ڈاکٹر سائیمہ بشیر ءَ بریفنگ دیگ ءِ وھد ءَ گوشت کہ پاکستان ءِ 40درسد آبادی ھچبر وانگجاہ ءَ نہ شتگ، وھدے کہ ایشی ءِ تہ ءَ ایوک ءَ 25درسد زالبول لیبر فورس ءِ بھر اَنت۔ ڈاکٹر سبینا درانی ءَ آبادی ءِ انتظام ءِ ھاتر ءَ سئے تبک ءِ گورننس ماڈل ءِ پیشکش کتگ کہ ایشی ءِ تہ ءَ راجی رہشونی ءِ ھوار دمگی کیاسگری ھم ھوار اِنت۔ احسن اقبال ءَ گوشت کہ انوگیں 2.55درسد سالانہ دیمروئی ءِ شرح ءَ پاکستان ءِ آبادی 2050ءَ تاں 386ملین ءَ چہ گیش بیت۔آئی ءَ اے گپ ءِ پدر کنگ ءَ گوشت کہ اگاں آبادی ءِ جیڈھ 18می آئین ءِ ترمیم ءَ پد صوبائی جیڈھ اِنت بلے ایشی ءِ اثر راجی تک ءَ گندگ بنت۔ آئی ءَ گوشت کہ راجی حکمت عملی ءِ ھست نہ بوھگ ءَ ٹکّر ٹکّریں کوشست کدی ھم جوانیں آسراتی دات نہ کن اَنت۔ منصوبہ بندی ءِ وزیر ءَ این ایف سی ءِ انوگیں ایوارڈ فارمولہ ءِ سر ءَ ھم ایراد گپتگ ءُ گوشت کہ 82درسد مالی وسیلگ آبادی ءِ بنیاد ءَ بھر ءُ بانگ کنگ بنت کہ ایشی ءَ چہ صوبگ آناں آبادی ءِ کم کنگ ءِ واستہ ھچ وڑیں مالی ترغیب نہ رسیت۔ آئی ءَ گوشت کہ اے فارمولہ ءِ چار ءُ تپاسی ءَ ابید صوبائی سنگینی ممکن نہ انت۔ آئی ءَ پاکستان ءِ آمار ءِ کارگس ءَ را ہدایت کت کہ آ صوبہ ءِ رد ءَ آبادی ءِ تفصیلی اعداد و شمار ءَ بہ دنت تانکہ اصل جیڈھ آنی پجارینگ بہ بیت۔ آئی ءَ گوشت کہ ڈیجیٹل مردم شماری 2023 ءِ رد ءَ ملک ءِ آبادی 241.49 ملین ءَ سر بوتگ کہ 2017 ءِ مقابلہ ءَ 33.8 ملین ءِ گیشی اِنت۔ اے بحران ءِ گیش ءُ گیوار ءَ کنت۔ سینیٹر شیری رحمان ءَ گشتگ کہ پاکستان ءَ ہر 50 منٹ ءَ زالبول زہگ ءِ ودی بوہگ ءِ وہد ءَ وتی چک ءَ چہ زبہر کنت۔ کمیشن ءِ جوڑیشت ءِ حمایت کنان ءَ آئی ءَ گوشت کہ ایشی ءِ اولی دیوان ءَ پد آبادی ءِ بحران ءَ را راجی ایمرجنسی ءِ جار جنگ بوت کنت۔ دیوان ءَ اے گپ ءِ سر ءَ سر بوتگ کہ چاگردی پڑ ءَ مدام بدلی پالیسی ءِ تسلسل ءَ را رکاوٹ جوڑ کن اَنت۔ وزیر اطلاعات عطا اللہ تارڑ ءَ 18می ترمیم ءَ پد جوڑ بوتگیں اختیارات ءَ را آبادی ءِ منصوبہ بندی ءِ تہا مزنیں رکاوٹ لیک اتگ۔ آئی ءَ گوشت کہ مذھبی رہشون آنی اثر ءُ رسوخ ھم مزنیں رکاوٹ اِنت ءُ بازار، یوٹیلیٹی اسٹور ءُ بنجاہی جان سلامتی ءِ یونٹ آنی تہ ءَ کمپین ءِ وسیلگ ءَ میتگ ءِ زالبول آناں حساس کنگ المی اِنت۔ آئی ءَ اے ھم سوج داتگ کہ اے کار ءِ واستہ ٹک ٹوک ءِ وڑیں سوشل میڈیا پلیٹ فارم کارمرد کنگ بہ بنت۔ وزیر مذہبی امور سردار محمد یوسف ءَ مذہبی قیادت ءُ کونسل آف کامن انٹرسٹس ءَ را ہوار کنگ ءِ سر ءَ زور پر دات وھدیکہ سینیٹر روبینہ خالد ءَ وزارت ءِ اطلاعات ءِ سروکی ءَ یک جامع سرپدی مہم ءِ بندات کنگ ءُ بی آئی ایس پی ءِ وسیلگ ءَ راجی تک ءَ السی رسائی ءَ را گیش کنگ ءِ سوج دات۔ ڈاکٹر زبشر ءَ گوشت کہ پیسریگیں ٹاسک فورس مینڈیٹ ءِ نہ بوھگ ءِ سبب ءَ ناکام بوتگ اَنت۔ ڈاکٹر سامیہ رزوان (یونیسیف) ءَ گشتگ کہ پاکستان ءَ ہر کلاک ءَ 30 نوزائیگ بیران بیت۔ آئی ءَ گوشت کہ حکومت ءَ را پری کنسیپشن ءِ جان سلامتی ءِ آسراتی آنی تہ ءَ سرمایہ کاری کنگی اِنت، ءُ دمگی چاگرد ایشی ءِ بھر بہ بنت۔ ڈاکٹر لوئی شبانا ءَ جان سلامتی ءِ نظام ءَ را مھکم کنگ ءُ کوتاہ ءُ دراجیں مدتی ترغیب آناں یکجا کنگ ءِ ضلورت ءِ سر ءَ زور پر دات۔ اقوام متحدہ ءِ دیمروئی پروگرام ءِ نمائندہ ءَ این ایف سی ایوارڈ ءِ چیر دستی ءَ انوگیں مالیاتی ڈھانچہ ءَ را پرانے ءُ بے اثر لیک اتگ کہ ایشی ءَ چہ ایوک ءَ آبادی ءِ گیشی ءَ را انعام دیگ بیت۔ خیبر پختونخوا ءِ آبادی ءِ وشحالی ءِ سیکرٹری ڈاکٹر انیلا محبوب درانی ءَ بنگلہ دیش ءِ سوبمندیں مثال داتگ کہ اودا مذہبی رہشون آبادی ءِ کنٹرول ءِ تہا ہوار بوتگ انت۔ پلاننگ کمیشن ءِ باسک ڈویلپمنٹ کمیونیکیشن آمنہ کمال ءَ زور پر دات کہ آبادی ءِ بابت ءَ مہم کنگ ءِ وھد ءَ الس ءَ را کمتر مہ لیکگ بہ بیت ءُ فیملی پلاننگ ءِ بابت ءَ گپ جنگ ءَ شرمندگی ءِ احساس مہ بیت۔ شریکیں مردماں مزن وزیر ءِ سروکی ءَ راجی آبادی کمیشن ءِ جوڑ کنگ ءِ سر ءَ تپاک کت کہ آ آبادی ءِ جیڑھ ءِ گیش ءُ گیوار ءِ ھاترا راجی حکمت عملی جوڑ کنت، ٹارگٹ ءِ ٹھینگ ءُ درستیں صوبہ آنی نمائندگی ءِ گوما کیاسگری ءِ نظام ءَ را دل یکیمی کنگ بیت۔
