اسلام آباد۔ 10 مئی (اے پی پی) اسلام آباد ہائی کورٹ الیکشن کمیشن نا کنڈآن شونداری کاریم ، تبادلہ و بھرتی تیا پابندی نا بابت جاری نوٹیفکیشن ءِ کالعدم گوندانے۔ پنچ شنبے نادے عدالت عالیہ نا جسٹس عامر فاروق و جسٹس محسن اختر کیانی آ تالان ڈویژنل بنچ بنجاو ہر چار آ صوبہ غاتا کنڈآن الیکشن کمیشن نا 11 اپریل نا نوٹیفکیشن نا برخلاف دائر درخواست آتیا سماعت کرے۔ سماعت نا وخت آ درخواست گزار نا وکیل موقف اختیار کرے کہ الیکشن کمیشن 11 اپریل آ شونداری کاریم و بھرتی تیا پابندی خلنگ نا نوٹیفکیشن جاری کرے،الیکشن کمیشن نا دا گام گیج غیر کانودی ءِ، الیکشن کمیشن حکومت کننگ نا 2 تُو انا اختیار آتے چٹفے۔ الیکشن ایکٹ نار داٹ الیکشن کمیشن الیکشن شیڈول جاری مننگ آن پد داوڑنا نوٹیفکیشن جاری کننگ کیک، الیکشن کمیشن گورنمنٹ نا اختیار آتے کاریم اٹ اتنگ کپک، الیکشن کمیشن نا کاریم صاف و شفاف الیکشن کرفنگ نا ءِ، الیکشن ایکٹ نار داٹ الیکشن کمیشن شیڈول جاری مننگ آن پد ملازم آتا تقرری و تبادلہ غاتیا پابندی خلنگ کیک، الیکشن کمیشن نا 11 اپریل آ نوٹیفکیشن ضمنی الیکشن کن موزوں ءِ تانکہ کسس الیکشن آ اثرانداز مف۔ عدالت کڑدہ غاتا دلیل پورو مننگ آن پد الیکشن کمیشن نا 11 اپریل نا نوٹیفکیشن ءِ کالعدم گوندا۔
