اسلام آباد۔ 10 مئی (اے پی پی) قومی خبررساں ادارہ ایسوسی ایٹڈ پریس آف پاکستان نا کنڈآن 2دے ئی جہانی کانفرنس آف نیوز ایجنسیز (آئی سی این اے) 13مئی آن بنجائی دارالحکومت اٹ بناء کیک ہرا اقوام عالم اٹ پاکستان نا اعتدال پسند تشخص ءِ پیش کننگ کن پاکستان نا امن نا کوشست آتے تالان کننگ و جہانی کہول آ اشتراک کار ءِ پین مون آ دننگ اٹ کمکار جوڑ مریک۔ پاکستان نا70 می یوم آزادی نا دود آتا مناسبت آن اڈ ہلوک آ دا کانفرنس 1990 ء آن پد تینا وڑنا ارٹمیکو کانفرنس مریک ہراٹی تینا قیام آن پد انا سفر ءِ نمان کننگ و ساڑی آ ڈیجیٹل دور اٹی پیشن نا دنیا تون ہڑتوم آ کنڈآتا تعلقداری تے پین سوگوی تننگ نا مساعی ءِ تالان کننگک۔ داکانفرنس نا سرحال’’خبررساں ادارہ غاتے کن مون آ بروک آ کسبی چیلنجز‘‘ ءِ۔ اے پی پی منیجنگ ڈائریکٹر مسعود ملک نا رداٹ داکانفرنس اے پی پی نا صحافی تے تین پہ تینی کمک و خبرآتا تبادلہ نا پین بشخ پٹنگ کن ایلو ملک آتا خبررساں ادارہ غاتون براہ راست و آسان رابطہ استوار کننگ نا موقع فراوان کیک۔ اوپارے کہ ڈیجیٹل کمیونیکیشن نا ساڑی آ دور اٹی قومی خبررساں ادارہ غاتا کڑد بھاز زیات اہمیت اختیار کرینے انتئے کہ اسہ قوم اس ہم عالمگیریت نا چیلنج آتون مون تننگ کن جتا مننگ کپک۔ مسعود ملک پارے کہ پاکستان نا خصوصی جغرافیائی و تزویراتی محل و وقوع نا سوب لمہ وطن و ڈیہہ نا بابت واقعہ و خبر آتے اوفتا حقی رداٹ آزاد دنیا اسکان سرکننگ سخت المی ءِ تانکہ الس ءِ بروخت و سہی احوال آتسکان رسینگ دوئی مننگ کے۔ اوپارے کہ اے پی پی جہانی خبررساں ادارہ غاتون خڑکی و فعال تعلقداری استوار کننگ نا گام گیج اس ہرفینے ہراڑآن اسہ کنڈ اوفتا خبر آتا کوریج اٹ ودکی مریک و ایلو کنڈ کم و ود 20 ملک آتسکان رسینگ ءِ وسعت ملک۔ اوپارے کہ کانفرنس نا ساڑی مروک آتے دابارواٹ معلومدار کننگ کہ ہراوڑ پاکستانی میڈیا دہشت گردی نا تاریک دہائی تا مشکل و ویل آتیان پیش تما و ہراوڑ قوم پرامن زند تدیفنگ کن مون تروک چیلنج آتا جیرت مندی اٹ مقابلہ ءِ کریر۔ کانفرنس اٹی آذربائیجان، بحرین ، بلغاریہ ، چین ، مصر، یونان ، انڈونیشیا ، ایران، قزاخستان، لبنان، اومان ، قطر، رومانیہ، سعودی عرب، سوڈان، شام ، تیونس و ترکی تون اوار 18 جہانی خبررساں ادارہ غاتا سروک و نمائندہ غاتا ساڑی مننگ گمانیءِ۔ کانفرنس اٹی چندی بشخ غاتیان کلیدی ترانکار آک اہم سرحال آتیا چار بنجائی نشست آتے ٹی خیال آتا درشانی ءِ کیرہ ہرافتے ٹی سوشل میڈیا ٹی خلاء ءِ پُر کننگ، دمدستی خبرو بمقابلہ مستند خبر، ڈیجیٹل دور اٹی خبررساں ادارہ غاتا کڑد و تین پہ تینی کمکاری، سی پیک، اقتصادہ رابطہ کن پیش گامی و میڈیا نا کڑد و جہانی و علاقائی امن اٹ پاکستان نا کڑد انا سرحال آک اوار ءُ۔ داڑے داہیت ذکر انا قابل ءِ کہ قومی خبررساں ادارہ اے پی پی نا 40جہانی خبررساں ادارہ غاتون خبر آتا ہڑتوم آ کنڈآتیا تبادلہ نا معاہدہ ساڑی ءِ و 17ایلوفتے تون داڈول نا معاہدہ غاتیا دستخط نا عمل ہم برجاءِ۔
