اسلام آباد۔ 22مارچ (اے پی پی) صدر مملکت ممنون حسین پارینے کہ پاکستان شاندار وارخواہی تا گل زمین ءِ ، ہراڑآن ننا سنگت ملک آک خاص کر نیامی ایشیائی ملک آک غٹ آن زیات فائدہ ہرفنگ کیرہ۔ پاک چین اقتصادی راہداری نا اڈ ہلنگ آن پد نیامی ایشیائی ملک آتے کن پاکستان اٹی چندی بشخ آتے ٹی زرکاری نا بھلو وارخواہی اس ودی مسنے ہرا دا ملک آتا اسیجائی فائدہ ٹی مریک۔ داہیت ءِ او ’’پاکستان وارخواہی نا گل زمین‘‘ نا سرحال آ جہانی سیمینار نا سینئر مندوبین آتا ڈل آتون ہیت وگپ کرسا پارے ہراک ایوان صدر اٹی اوڑتون اوڑدہی کریر۔ داوخت آ نیشنل سیکورٹی ایڈوائزر لیفٹیننٹ جنرل ناصر جنجوعہ ، تعلقدار ملک آتا سفیر و ایلو بڑزکو کمامدارآک ہم ساڑی ئسر۔ صدر مملکت پارے کہ نیام ایشیانا ملک آک وپاکستان نا نیام اٹ بھلو تاریخی و دودوربیدہ ہی رشتہ اسے ہرازند انا ایلو بشخ آتے ٹی ننا کمکاری ءِ زیات بامعنی جوڑ کیک۔ اوپارے کہ پاکستان چین اقتصادی راہداری ناجوڑ مننگ آن پد ڈیہہ ٹی شونداری و شونہالی کن بے شمار پوسکن ءُ وارخواہی ودی مریک ہراڑآن نیامی ایشیائی ملک آک خاص وڑاٹ فائدہ ہرفنگ کیرہ۔ دامسخت کن المی ءِ کہ پاکستان و ڈیہہ نا ایلو ملک آتا نیام اٹ سرکاری و غیر سرکاری ، ہڑتوم آ کہول آتیا تعلقداری تے مون آ دننگے۔ جتا زند انا بشخ آتون تعلق تخوک آ ڈل آک زیات آن زیات دورہ کیر تانکہ چندی بشخ آتا چاہندار آک دا ملک آتے ٹی کاریم کننگ نا وارخواہی پٹسا اوفتا فائدہ غاتے الس نا شونداری و شونہالی کن کاریم اٹ اتنگ کیر۔ صدر مملکت پارے کہ ڈیہہ ٹی ودی مروک آ انتہاء پسندی و دہشت گردی نا سوب تین پہ تینی واپار و ایلو واپاری سرجزآتے ٹی اڑاند ودی مسوسس ولے حکومت پاکستان آپریشن ضرب عضب و ردالفساد نا کمک اٹ دہشت گردی نا مون ءِ تورینے۔ دہشت گرد آتا ٹھکانہ غاتے بھس کننگ انگ ءِ ہراٹی امن و ایمنی گچین مننگ ءِ و صنعتی و واپاری سرجزآک زیات مننگ ءُ۔ڈل اٹی ازبکستان نا مسکوہی نائب وزیراعظم و چیمبر آف کامرس نا چیئرمین اکراموآدم الہا مووچ ، نیشنل انسٹی ٹیوٹ آف اسٹریٹجک اسٹڈیز کرغزستان نا بیدولیتوف نورادل ایسن بکووچ ، قزاخستان انسٹیٹیوٹ اسٹریٹجک اسٹڈیز نا جارجے دبووٹسو، تاجکستان نا سنٹر اسٹریٹجک اسٹڈیز نا ڈائریکٹر خدابردی خلیق نظر، ترکمانستان نا نائب وزیر معیشت مردان بیرام دردیوو آن بیدس جمہوریہ کرغزستان ، قزاخستان ، ازبکستان ، تاجکستان و ترکمانستان نا سفیر ئسک ہم ساڑی ئسر۔
