اسلام آباد۔ 22مارچ (اے پی پی) بنجائی وزیر داخلہ ، ڈٹ بندی ، شونداری و اصلاحات پروفیسر احسن اقبال پارینے کہ بھارتی سفیر نا ساڑی گری ٹی افسوز اٹ پاننگ خواوہ کہ دنیا شون ہلنگ ءِ ولے نن جھیڑہ غاتا گواچی اُن، ننا نسل آک ننے معاف کپسہ، پاکستان و بھارت نا تعلقداریک داخہ جوان افس، ننے جھیڑہ غاتیان تینے کشسا مون آ ہنوئی مریک، سی پیک اقتصادی شونداری و علاقائی کمکاری نا ڈٹ اسے ۔ داخیال آتا درشانی ءِ او پنچ شنبے نادے ویب آف ٹرانسپورٹ کوریڈورزان ساؤتھ ایشیا نا دود آن تران کرسا کرے۔ بنجائی وزیر پارے کہ ننے کمکاری نا کنڈآ ہنوئی مریک، پاکستان و بھارت نا اقتصادی ٹک آک جوان ءُ، پاکستان ، بھارت تون اوار ایشیائی ملک آتا راجی ٹک آک جوان افس، جھیڑہ غاتیاخڑچ کروک آ وسیلہ غاتے راجی بشخ انا شونداری آ کاریم اٹ اتوئی مریک۔ جھیڑہ غاتیان پیش تمنگ آن بیدس سویلی ایشیاٹی شونداری مننگ کپک۔ سی پیک سازش نا ڈٹ اس اف، سی پیک آ بھارت نا ردعمل بایدے مثبت مرے۔ اوپارے کہ سی پیک اقتصادی شونداری و علاقائی کمکاری نا ڈٹ اسے، پاکستان و بھارت نا تعلقداریک داخہ جوان افس ولے اقتصادی شونداری نا اعتبار اٹ ہروئی مریک، خلقت ءِ ویزہ ٹی مشکل آتون مون تروکی ءِ ، زرکارآتے بزنس ویزہ ملپک تو انفراسٹرکچر نا ہچ ءُ فائدہ اس اف۔ اوپارے کہ سویلی ایشیانا ملک آک اواری اٹ شون ہلنگ کیرہ، ڈیہہ نا شونداری کن ٹرانسپورٹ راہداری بے کچ اہم ءِ۔ اوپارے کہ سال 2050 ء اسکان جی ڈی پی ٹی ایشیا نا بشخ 52 درسد مریک، آبادی نا لحاظ اٹ ایشیا مسٹ میکو بھلا ڈیہہ جوڑ مریک ، بدقسمتی اٹ سویلی ایشیا ٹی شونداری نا بے شمار وارخواہی تیان فائدہ ہرفنگ پننگ ءِ ۔ اوپارے کہ سویلی ایشیا تین پہ تینی رابطہ و کمکاری نا اعتبار اٹ آخریکو نمبر آٹی ءِ، ڈیہہ نا آخبت علاقائی کمکاری و واپار تون گنڈوک ءِ۔ اوپارے کہ شون ہلوک آ ملک آتے مصنوعات آتا بہاء کننگ کن پوسکن ءُ منڈی پٹوئی مریک ، پوسکن آ منڈی تسکان رسینگ کن ٹرانسپورٹ راہداری المی ءِ۔ اوپارے کہ گوادر آن کوئٹہ نا نیام اٹ 70 سال اسکان ہچ ءُ روڈ اس الوکہ، داسہ گوادر و کوئٹہ نا نیام اٹ روڈ جوڑ کرینن، علاقائی نیزگاری نا چٹفنگ کن رابطہ غاتے ودفوئی مریک۔ بلوچستان اٹی استحصال نا گواچی بزغر آتے تینا مصنوعات آتا بہاء کننگ نا پوسکن ءُ وارخواہی ملا۔ بنجائی وزیر میڈیا ٹاک اٹی پارے کہ چین پاکستان اقتصادی راہداری ڈیہہ نا شونداری کن ءِ، بھارت نا ردعمل مثبت اف، اقتصادی راہداری نئے فوجی ڈٹ اسے و نئے کہ سازش اسے، دا ڈٹ ڈیہہ ٹی شونہالی اتنگ نا ڈٹ اسے۔ اوپارے کہ داڈٹ آن ڈیہہ نا 3 ارب خلقت ءِ فائدہ رسینگک۔ داوخت آ جہانی بینک انا کنٹری ڈائریکٹر ایلان گوان پاچا موتو پارے کہ سی پیک نا ڈٹ پاکستان کن شونداری نا بھلو موقع اس فراوان کننگ ءِ، سی پیک آن ڈیہہ ٹی علاقائی کمکاری ءِ مون آ دننگک۔
