لاہور۔ 13دسمبر (اے پی پی) وزیراعظم محمد نواز شریف پارینے کہ نبی آخرالزماں صلی اللہ علیہ وسلم امت مسلمہ ئِ ہندن ئُ کسر اس نشان تس ہرا دنیا و آخرت اٹی سرسہبی نا ضمانت ئِ ، دنیا دا امنا کننگ آ مجبور ئِ کہ امن و شونداری کن آپ صلی اللہ علیہ وسلم نا نقش قدم آ چلینگسا ہی مزل ئِ پٹنگ مریک، قرآن مجید تون اوار اوار میثاق مدینہ و خطبہ حجتہ الوداع ہندن ئُ گچین ئُ دستاویز ئُ ہرافتے آن راہشونی ہلسا غٹ ویل آتے ایسر کننگ مریک۔ مسکوہی سال آتا وخت ملک اٹی اسلام نا پن آ پھسات تالان کننگا، حکومت مسہ سال انا کوشست آن پھسات نا درگہ ئِ بھلو حد اسسکان بند کرے۔ حکومت قومی سروک، عالم دین و مشائخ، فوج و ایلو ریاستی ادارہ غاتا قربانی تیان دہشت گرد آتا بنجاتے تقریباََ چٹفنگانے۔او دوشنبے آ داڑے ہندی ہوٹل اٹی وزارت مذہبی امور بین المذاہب ہم آہنگی نا کنڈآن ”بین المذاہب ہم آہنگی اسلامی تعلیمات و اسوہ رسول صلی اللہ علیہ وسلم نا روشنی ٹی “ نا سرحال آ اڈ ہلوک آ بین الاقوامی سیرت النبی صلی اللہ علیہ وسلمکانفرنس آن تران کریکہ۔ داوخت آ بنجائی وزیر مذہبی امور سردار محمد یوسف ، صدر مذہبی امور ترکی ڈاکٹر مہمت گورمیز، نائب وزیر مذہبی امور مالدیپ علی وحید تون اوار سینٹ نا باسک، قومی و صوبائی اسمبلی،بنجائی و صوبائی وزیر آک ، عالم دین و مشائخ عظام و غٹ مذہب آتا سکالرآک ساڑی ئسر۔ وزیراعظم پارے کہ نبی کریم صلی اللہ علیہ وسلم نا تشریف آوری داہیت انا پڑو ئس کہ آسمان آن نازل مروک آ ہدایت تینا درجہ کمال آ سرمسر۔ تینٹ اللہ تعالیٰ آپ صلی اللہ علیہ وسلم نا تشریف آوری ئِ مومن آتیا تینا احسان گوندا و داہیت اٹی ہچئُ شک اس اف کہ رحمت اللعالمین ؑ مومن آتے ہندن ئُ کسر اس نشان تس ہرا دنیا و آخرت اٹی سرسہبی نا ضمانت ئِ و ہرا اسوہ حسنہ غا عمل کیک نجات اونا مقدر مریک۔ اوپارے کہ اللہ تعالیٰ نا رسول صلی اللہ علیہ وسلم امت آ حق انا شہادت تس و دا زمواری امت ئِ تننگاکہ او حق انا گواہ جوڑ مرسا سلر، صحابہ کرام آن گڈ بزرگان دین دازمواری ئِ پورو کریر و نن دا امانت نا وارث اُن و نن چانہ کہ امانت انت اسے و ننے دا زمواری ئِ امر پورو کروئی ئِ، دازمواری ئِ پورو کننگ کن ننے رحمت اللعالمین صلی اللہ علیہ وسلم نا سیرت آتا کنڈارجوع کروئی تمک۔ وزیراعظم پارے کہ حضرت محمد ؑ ہراتم ہجرت کرسا مدینہ غا بس تو تینا راہشونی ٹی اولیکو اسلامی معاشرہ اس قائم کرے و اسہ ریاست اس وجود اٹی بس و او ہموڑے غٹ خلقت آتون معاہدہ کرے ، تاریخ اودے میثاق مدینہ نا پن اٹ چائک و بھاز انگا سکالرآک دادے اولیکو نوشتہی آئین ہم گوندرہ ۔ ااوپارے کہ دنیا آن پردہ فرمائفنگ آن منہ وخت مست نبی صلی اللہ علیہ وسلم اولیکو و آخریکو حج ئِ کرے و عظیم مچی سے آن خطبہ ارشاد فرمائفے ہراٹی او دنیا نا مون آ انسانی حق انا جہانی چارٹر ئِ پیش کرے و 1400 سال گڈ تہذیب نا ارتقاءانسان ئِ ہنداجاگہ آ ایسونے سلفینے ہراڑے اسہ جدید ریاست اسے قائم تخنگ کن آئین نا گرج ئِ و داڑکن انسانی حق انا چارٹرہم المی ئِ۔ اوپارے کہ اینو دنیاہم دا امنا کننگ آ مجبور ئِ کہ معاشرہ ٹی امن و شونداری کن آپ ؑ نا نقش قدم آ چلینگسا ہی مزل ئِ پٹنگ مریک۔ اوپارے کہ مذہب راج انا اولیکو خشت انسانیت نا شرف ئِ ، خطبہ حجتہ الوداع نا وخت آ آپ ؑ فرمائفے کہ ” عجمی ئِ عربی آ عربی ئِ عجمی آ و پیہون انگا ئِ مون آ و مون انگا ئِ پہیون آ ہچ ئُ فضیلت اس اف“ ، ہندا خطبہ ٹی نبی ؑ انسان نا جان نا حرمت ئِ بیت اللہ نا حرمت نا بریبر گوندا، آپ ؑ الزام تراشی و تہمت ئِ جرم گوندا، خلقت ئِ ہندن ئُ پن تخنگ آ روکا ہراڑآن ایلوفتا است آزاری مرے۔ داوخت آ بنجائی وزیر مذہبی امور سردار محمد یوسف ، صدرمذہبی امور ترکی نا ڈاکٹر مہمت گورمیز ئسک ہم تران کریر۔
