اسلام آباد۔ 30نومبر (اے پی پی) پارلیمانی سیکرٹری خزانہ رانا محمد افضل پارینے کہ پاکستان اٹی پیشن نا زرکاری کن حالیت آک سازگار ئُ و اوٹی نمان ودکی خننگ انگ ئِ ، مسکوہی مسہ سال اناوخت مواصلات نابشخ اٹی 19کروڑ 52لکھ ڈالر، توانائی نا بشخ اٹی 56کروڑ 66لکھ ڈالر نا زرکاری مس۔ چارشنبے آ قومی اسمبلی نا دیوان اٹی وقفہ سوج آتا وخت شازیہ مری نا سوج انا ورندی ٹی پارلیمانی سیکرٹری رانا محمد افضل پارینے کہ مسکوہی مسہ سال انا وخت پاکستان اٹی مواصلات نا بشخ اٹی 19کروڑ 52لکھ ڈالر، بجلی نا بشخ اٹی 56کروڑ 66لکھ، تی و گیس انا بشخ اٹی 26کروڑ 16لکھ ڈالر نا زرکاری مس۔ دا سال تیٹی ہرا پیسہ پیشن ہنا او کم و ہراداڑے بس او زیات ئُ۔ اوپارے کہ دا زرکاری ئِ ودفنگ کن ملک اٹی امن و ایمنی ئِ گچین جوڑ کننگ، توانائی نا بشخ اٹی گچینی اتنگ، تھرکول ڈٹ، ایل این جی درآمد کرساتوانائی تنکی نا مون ئِ توننگ کن گام گیج چست کننگ انگ ئِ۔ صوبائی حکومت آک ای گورننس، امن و ایمنی ئِ گچین جوڑ کننگ ئُ۔ چین پاکستان اقتصادی راہداری ڈٹ انا رداٹ 46ارب ڈالر اہم زرکاری مریک۔ شیخ صلاح الدین نا سوج انا ورندی ٹی اوپارے کہ اٹلی آن چارٹرڈ جہاز آ 80 نا خڑک بزنس ڈل اسہ اِرا دے اٹی بننگ ئِ ہرا مسہ دے داڑے سلرہ۔ ایف بی آر اٹی شفافیت نا بابت حالیت آک گچین مسنو۔ محصولات وصولی ٹی 62درسد ودکی مسنے۔ باسک آک ٹرانسپرنسی ئِ گچین جوڑ کننگ کن کڑد ادا کیر۔
