پٹرول ءُ ڈیزل ءِ نرخانی تہ ءَ مزنیں کمی ءَ چہ کاروباری ھرچ ءُ درچ ءُ سرکاری مالیاتی دباؤ ءَ را مزنیں کساسے ءَ کمی کیت، پاکستان بزنس فورم

اسلام آباد۔20جون  (اے پی پی): پاکستان بزنس فورم ءَ مزن وزیر شہباز شریف ءِ پٹرولیم ءِ چیز آنی نرخ آنی تہ ءَ مزنیں کساسے ءَ کمی ءِ گامگیج ءَ را الس، صنعت، تجارت ءُ معیشت ءِ واستہ مزنیں ریلیف لیک اتگ۔ چیف آرگنائزر پاکستان بزنس فورم احمد جواد ءَ شمبے ءِ روچ ءَ میڈیا ءِ نمائندگاں گوں تران کنان ءَ گوشت کہ پٹرول ءِ تہ ءَ 74 کلدار ءَ تاں ءُ ڈیزل ءِ تہ ءَ 67 کلدار ءَ تاں کمی سک باز وش اتک کنگ بیت۔ آئی ءَ گوشت کہ اے پیسلہ ءَ چہ الس آناں نہ ایوک ءَ براہ راست ریلیف رسیت بلکینگ ءَ کاروباری ھرچ ءُ درچ، ٹرانسپورٹ ءِ ھرچ ءُ درچ ءُ صنعتی پیداوار ءِ ھرچ ءُ درچ ءَ را ھم مزنیں کساسے ءَ کم کنگ بیت ایشی ءَ چہ سرجمیں معیشت ءِ سر ءَ جوانیں اثر کپ ایت۔ احمد جواد ءَ گوشت کہ مزن وزیر شہباز شریف ءَ گلوبل مارکیٹ ءَ نہاد آنی تہ ءَ کمی ءِ مزنیں سیت ءَ را الس ءِ سر ءَ دیم دیگ ءَ جوانیں مثال پیش کتگ۔ آئی ءِ رد ءَ اے گامگیج اے گپ ءِ ثبوت اِنت کہ حکومت لس مھلوک ءِ جیڈھ آناں ھیال ءَ دارگ ءَ ریلیف ءِ پجارینگ ءِ سر ءَ سنجیدہ اِنت۔ آئی ءَ امیت سہرا کت کہ مزن وزیر السی کمک ءِ اے سلسلہ ءَ را گیش دیم ءَ برگ ءَ انت ءُ آیوکیں روچ آنی تہ ءَ ایندگہ شوبگ آنی تہ ءَ ھم نرخ ءُ لاگت ءِ بوجھ ءَ را کم کنگ ءِ گامگیج دیم ءَ آرگ بنت۔ پاکستان بزنس فورم ءِ سروک آرگنائزر ءَ گوشت کہ ایران ءُ امریکہ ءِ نیام ءَ کش ءُ چیل آنی تہ ءَ کمی ءُ پڑ ءَ برجائی ءِ واستہ پاکستان ءِ سفارتی کوشست ستا کرز انت۔ آئی ءَ گوشت کہ دمگ ءَ امن ءِ دیمروئی، کش ءُ چیل آنی تہ ءَ کمی ءُ سفارتی توازن ءِ برجائی ءِ تہ ءَ پاکستان ءِ کرد راجدپتر ءَ جوانیں رنگ ءَ یات کنگ بیت، پرچا کہ اقتصادی برجائی ءُ توان ءِ نرخ ءِ دمگی امن ءُ جہانی تیل ءِ مارکیٹ ءِ برجائی ءَ گوں براہ راست سیادی داریت۔ احمد جواد ءَ حکومت ءَ را زور پر دات کہ پٹرولیم ءِ نرخ آنی تہ ءَ کمی ءَ پد توان ءِ شوبگ ءَ گیش اصلاحات آناں آرگ بہ بیت تانکہ پائیدار بنیات ءِ سر ءَ الس ءُ صنعت دوئیں آناں ریلیف پجارینگ بہ بیت۔ آئی ءَ گوشت کہ بنجاہی بجلی ءِ ٹیرف آنی تہ ءَ کمی ءُ گیشیں سرچارج آنی تہ ءَ کمی ناگزیر اِنت۔ اگاں حکومت توانائی ءِ ھرچ ءُ درچ ءِ تہ ءَ راستیں کمی آرگ ءَ سوبین بہ بیت گڈا پیداوار ءِ ھرچ ءُ درچ، مہنگائی ءُ کاروباری جیڈھ آنی تہ ءَ مزنیں کساسے ءَ کمی اتک کنت۔ آئی ءَ گوشت کہ حکومت فنانس بل ءِ منظوری ءِ وھد ءَ ڈیری پروڈکٹس ءِ سر ءَ ایر کتگیں جی ایس ٹی ءَ را زوت ھلاس بہ کنت۔ آئی ءِ رد ءَ شیر، دہی، پنیر ءُ دگہ بنیاتی ڈیری پروڈکٹ لس مردم ءِ روچ مرزی وردن ءِ لوٹانی بہر انت پمیشکا ایشی ءِ سر ءَ ٹیکس ایر کنگ راج ءِ سر ءَ گیشیں بار ایر کنگ ءِ برابر انت۔ آئی ءَ گوشت کہ دیمروئی کنوکیں ملک آنی تہ ءَ ھم بنیاتی وردن ءُ وراک ھاسیں رنگ ءَ ڈیری پروڈکٹس عمومی رنگ ءَ ٹیکس ءَ چہ یلہ کنگ بنت پمیشکا پاکستان ءَ ھم اے بنیاتی لوٹ ءِ سر ءَ جی ایس ٹی ھلاس کنگ بہ بیت تانکہ الس ءَ را راستیں ریلیف رس ایت۔ احمد جواد ءَ کشت ءُ کشاری شوبگ ءِ ھاسیں رنگ ءَ کپاس ءِ زندگ کنگ ءَ را راجی اقتصادی اولیت لیک اتگ ءُ لوٹ کتگ کہ حکومت ءَ چہ زوت یک جامع پالیسی ءُ سبسڈی پروگرام ءِ بندات کنگ بہ بیت تانکہ ملکی کپاس ءِ پیداوار ءَ را گیش کنگ بہ بیت۔ آئی ءَ گوشت کہ پاکستان ءِ سالانہ کپاس ءِ کارمردی 12.5ملین بیل ءِ کساس ءَ اِنت، وھدیکہ ملکی پیداوار کم اِنت، ایشی ءِ سبب ءَ ملک ءَ را مزنیں کساس ءَ درآمدیں کپاس ءِ سر ءَ انحصار کنگی اِنت۔ آئی ءِ رد ءَ اے جاور ھال نہ ایوک ءَ ٹیکسٹائل سیکٹر ءِ ھرچ ءُ درچ ءَ گیش کنگ ءَ انت بلکینگ ءَ ارزشتی ایں درملکی زرّ ءِ تاوان ھم بوھگ ءَ انت۔ آئی ءَ گوشت کہ کشت ءُ کشاری ءَ را پدا کپاس ءِ کشت ءُ کشار ءِ نیمگ ءَ راجیگ کنگ ءِ واستہ وفاقی ءُ صوبائی حکومت ءِ کمک ءَ یک جامع سبسڈی پروگرام ءِ برجائی کنگ بہ بیت، ایشی ءِ تہ ءَ کوالٹی ءِ بیج، کشت ءُ کشاری ان پٹ، مالی آسراتی، فصل ءِ مناسب نرخ ءُ مارکیٹ ءِ کمک ھوار بہ بنت۔ آئی ءَ گوشت کہ حکومت وھد ءِ سر ءَ گام گیج بہ کنت گڈا نہ ایوک ءَ دمگی کپاس ءِ پیداوار ءَ مزنیں گیشی ءِ امکان انت بلکینگ ءَ درآمد ءِ بل ءَ کمی ءُ برآمد ءِ صنعت ءَ را مزنیں کمک ھم ممکن انت۔