معیشت شون نا کسر آ روان ئِ، پاک چین اقتصادی راہداری ڈٹ آ عملدرآمد نا اولیکو مرحلہ سرسہبی اٹ پورو مسنے
اسلام آباد۔ 30نومبر (اے پی پی) پارلیمانی سیکرٹری ڈٹ بندی و شونداری ثقلین بخاری پارینے کہ پاکستان اٹی امن و ایمنی و دہشت گردی نا بابت حالیت آک یکسر بدلینگانو۔ پاکستان نا معیشت شونداری نا کسر آ روان ئِ، پاک چین اقتصادی راہداری ڈٹ آ عملدرآمد نا اولیکو مرحلہ نا سرسہب پوروی مسنے، چین و پاکستان نا حکومت آک داڑکن فعال و چوکس ئُ۔ چارشنبے آ قومی اسمبلی نا دیوان اٹی وقفہ سوج آتا وخت خالدہ منصور نا سوج انا ورندی ٹی وزارت ڈٹ بندی و شونداری و اصلاحات نا پارلیمانی سیکرٹری ثقلین بخاری پارے کہ پاک چین اقتصادی راہداری ڈٹ انا بھلا ویل سیکورٹی ئِ۔ داڑکن پاکستا ن وچین نا حکومت چوکس ئُ۔ دا ڈٹ آ عمل اسہ سوالیہ نشان اس ئس۔داٹی است خواہی و گام گیج آتیان دانا اولیکو مرحلہ سرسہبی اٹ گدرینگا۔ پاکستان اٹی حالیت آک بدل مسنو۔ معیشت شون ہلنگ ئِ۔ داڑآ حکومت م، فوج و ادارہ غاک کاریم کننگ ئُ۔ شیر اکبر خان نا ضمنی سوج آ اوپارے کہ سی پیک مچ آ پاکستان کن ئِ۔ غٹ صوبہ غاک داڑتون گنڈوک ئُ۔ آزاد کشمیر ہم اوارئِ۔ داٹی غٹ آن زیات فوکس توانائی نا ڈٹ آتیا ٹی ئِ۔ 2018ءٹی وزیراعظم نا وعدہ غاتارداٹ بجلی تنکی آن قومی ئِ نجات ایتنہ۔ میجر طاہر صادق پارے کہ داڑے باسک آک جھک سلسا اعتراض کیرہ منفی شرہ مریک داڑآ داڑے اسہ بریفنگ اس منعقد کننگے تانکہ دا منفی شرہ آن نجات ملے۔ پارلیمانی سیکرٹری پارے کہ داڑآ ہچ گہس ئِ اعتراض اف۔
