اسلام آباد۔ 29نومبر (اے پی پی) قومی اسمبلی ملک اٹی گیس انا لوڈشیڈنگ نا چٹفنگ کن حکومت نا کنڈآن گام گیج چست کننگ نا قرارداد ئِ منظور کرے وخت اس کہ باسک آک پارینو کہ ملک آن گیس انا لوڈشیڈنگ نا چٹفنگ کن ایران پاکستان و تاپی گیس پیپ لین ڈٹ آتے عملی جامہ بیرفنگے، ملکی کہول آ گیس انا کوڑی نا دریافت کن گام گیج چست کننگے، گیس انا خستہ حال پیپ لین تے بدل کرفنگے۔ سے شنبے آ قومی اسمبلی نا دیوان اٹی نعیمہ کشور خان پارے کہ گیس انا لوڈشیڈنگ نا بابت شرہ مسنے ، داسہ صرف تعلقدار وزیر ئِ شرہ ئِ چٹفوئی ئِ۔اعجاز جاکھرانی پارے کہ فاضل باسک درست پیدواری کرینے۔ شازیہ مری پارے کہ یخ انا موسم نا بناءمسنے۔ گیس لوڈشیڈنگ آن الس فریشان ئِ۔ حکومت گیس و بجلی نا لوڈشیڈنگ ئِ چٹفے۔ عائشہ سید پارے کہ گیس لوڈشیڈنگ نا سوب لمہ غاک چناتے ناشتہ ہم تننگ کپسہ، جنگل آتے ہم ہنداسوب آن کاٹنگ انگ ئِ۔ حکومت دا بد انتظامی ئِ مر کرسا گچین گام گیج چست کے۔ ڈاکٹر فہمیدہ مرزا پارے کہ ہراوخت اسکان عملی گام گیج چست کننگپک ہیت کننگ آن ہچ اس مفک ۔ بنجاو صوبہ بدین اٹی گیس انا لوڈشیڈنگ شیڈول نا رداٹ مننگ باوری جوڑ کے۔ بنجائی وزیر کانود زاہد حامد پارے کہ تعلقدار وزیر توانائی آن تعلقدار کمیٹی نا دیوان اٹی ئِ۔ ڈپٹی اسپیکر پارے کہ کمیٹی پارلیمنٹ آن زیات اہم اف ، پین وخت اس دُنو ورندی فلور آ بایدے بف۔ اگہ اودے ہنوئی ئس تو وزیر مملکت یا کس اسے پاروسس۔ طاہرہ اورنگزیب پارے کہ ایران پاکستان گیس پیپ لین ڈٹ اٹی تاخیر ہراڑے کن ئِ۔ گیس انا پوسکن ئُ کوڑی پٹنگے۔ مولانا گوہر شاہ پارے کہ چارسدہ ٹی لوڈشیڈنگ نا توننگ کن گیس پیپ لین ئِ بدل کننگے۔ میجر(ر) طاہر اقبال پارے کہ پاکستان اٹی گیس انا سپلائی ڈیمانڈآن 40درسد کم ئِ۔ حکومت بھاز خواری کرے و انڈسٹری ئِ پورو گیس فراوان کرے۔ ایل این جی نا درآمد نا عمل ئِ ترند کننگے تانکہ گیس انا ویل ایسر مرے۔ ایران ، پاکستان و تاپی گیس ڈٹ آتیا پبی وڑٹ کاریم بایدے مرے۔ نعیمہ کشور خان پارے کہ ننا ہیت انا دیر ورندی ئِ ایتک۔ نوٹس دیر ہلنگ ئِ۔ ڈپٹی اسپیکر پارے کہ وزارت نا بندغ آک ساڑی ئُ نوٹس ہلنگ ئُ۔
