اسلام آباد۔ 17نومبر (اے پی پی) پاکستان مسلم لیگ (ن) نا سینیٹر جاوید عباسی پارینے کہ بھارت شدت پسندی و انتہاپسندی نا سوب بھس کاری نا کنڈاہِننگ ئِ۔ ریڈیو پاکستان تون ہیت وگپ کرسا اوپارے کہ پاکستان مسلم لیگ (ن) نا حکومت وپاکستان نا فوج بھارت آ صفا کرینے کہ ہربیدادی نا پبی ورندی ئِ تننگک۔ اوپارے کہ بھارت ڈیہہ ٹی انتہاپسندی وشدت پسندی تالان کننگ ئِ ہراڑآن او تینٹ بھس کاری نا کنڈاہِننگ ئِ۔ جاوید عباسی پارے کہ وزیراعظم محمد نواز شریف بھارتی سروک ئِ صفا انگا لوز آتیٹی پارینے کہ اوخام خیالی ٹی مفئے، ہر بیدادی نا اودے ہندن ئُ ورندی اس تننگک ہرادے او قیامت اسکان یات تخے۔ اسہ سوج اسے نا ورندی ئِ ترسا اوپارے کہ پاکستان نا حکومت کشمیر نا ویل آ صفاموقف ئِ کہ اودے اقوام متحدہ نا قرارداد آتا رداٹ بایدے ایسر کننگے۔ اوپارے کہ مقبوضہ کشمیر اٹی جاری ساڑی آ تحریک آجوئی داسہ سلپک و اوٹی شریک ورناتا پاننگ ئِ کہ داسہ او دا ویل ئِ ایسر کرفسا گڑا چپ تولرہ۔ سینیٹر جاوید عباسی پارے کہ بھارت ئِ کشمیر نا ویل انا ایسری کن مذاکرات نا میز آ بروئی مریک و اگہ او تینا ہٹ دھرمی ئِ ہلیتوتو دا بھارت و ڈیہہ کن خطرناک ثابت مننگ کیک۔
