کوئٹہ۔ 16نومبر (اے پی پی) وزیراعلیٰ بلوچستان نا کوآرڈینیٹر مرزاشمشاد پارینے کہ گوادر بندرگاہ ئِ پاک چین اقتصادی راہداری ڈٹ اٹی بنجائی حیثیت دوئی ئِ، گوادر بندرگاہ آن واپار نا بناءگوادر تون اوار مچ آ بلوچستان نا الس و پوریاگر آتے کن تاریخی ئُ مزل نا نشان اسے نا حیثیت تخک۔ ہراڑآن روزگار نا وارخواہی ودنگ تون اوار اوار واپاری کچ اٹی ہم ودکی مریک۔ داخیال آتا درشانی ئِ او ”اے پی پی“ تون ہیت وگپ کرسا کرے۔ مرزا شمشاد پارے کہ اقتصادی راہداری ڈٹ پاک چین تعلقداری تے پوسکن آ بڑزی تسکان دننگ و ہڑتوم آ سنگت ملک آتا نیام اٹ تعلقداری تے پین سوگوجوڑ کننگ اٹی کمکار ثابت مریک۔ سی پیک نا پوروی آن نہ صرف پاکستان بلکن مچ آ ڈیہہ ٹی شونہالی و شونداری بریک ۔ مرزا شمشاد پارے کہ گوادر آخبت نا عظیم الشان بندرگاہ جوڑ مننگ ئِ ہرا مچ آ ڈیہہ نا الس نا قسمت ئِ بدلیفنگ اٹی اہم انگا کڑد ئِ ادا کیک۔ اوپارے کہ پاک چین اقتصادی راہداری ڈٹ آن بلوچستان اٹی واپارو صنعت ئِ مون آ دننگ و شونداری و شونہالی نا روشنا دور انا بناءمریک وخت اس کہ بے روزگاری ٹی کمتی و زرکارآتا ہن و براٹی ترندی و کاروبار ئِ مون آ دننگ رسینگک۔
