بیجنگ۔ 02 ستمبر (اے پی پی) پاکستان و چین تزویراتی شریداری ءِ پین سوگو کننگ کن تینا اسیجائی عزم انا درشانی ءِ کرسا ہڑتوم آکنڈآتا کمکاری ءِ پین ودفنگ آامنا کرینو ، وزیراعظم محمد شہباز شریف پارے کہ پاکستان شونداری نا عظیم سفر اٹی چین اتون اواری اٹ کاریم کننگ کن تیار ءِ وخت اس کہ صدر شی جن پنگ پارے کہ سی پیک تینا ارٹ میکو ریسہ ٹی پترینگانے، چین اقتصادی شونداری نا غٹ بشخ آتیٹی پاکستان نا کمک ءِ برجاتخک۔ سے شنبے نادے آوزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف بیجنگ نا عظیم عوامی ہال اٹی السی جمہوریہ چین نا صدر شی جن پنگ تون اوڑدہی کرے ۔ بیان نا رداٹ بے کچ خوشگوار چاگڑد اٹی مروک آ اوڑدہی ٹی ہڑتوم آراہشونک پاکستان و چین نا نیام اٹ تینا سوگو و وخت انا ہرآزمائشت آ پورو سلوک، تزویراتی کمکاری آ تالان شریداری ءِ پین سوگو کننگ کن تینا اسیجائی عزم انا درشانی ءِ کریر۔ وزیراعظم تیانجن اٹی شنگھائی کمکار تنظیم نا سروک مملکت نا دیوان نا سرسہب اڈتننگ آ صدر شی جن پنگءِ مبارکبادی تس و فسطائیت نا برخلاف جنگ اٹی عظیم سرسہبی نا 80 می سال دے انا وخت آ اودے مبارکبادی تس۔ صدر شی جن پنگ نا دور اندیش سرکڑدہ ئی، ہرانا سوب چین جدیدیت و شونداری نا مزل آتے طے کرے، نا ستاءِ کرسا وزیراعظم پارے کہ پاکستان ءِ چین نا سرسہبی تیا بھاز گمر ءِ و او دا عظیم سفر اٹی چین اتون اواری اٹ کاریم کننگ کن مدام تیار ءِ۔ وزیراعظم پاکستان نا علاقائی سالمیت ، وتواجہی و راجی واقتصادی شونداری کن چین نا بدل مفروک مخ تفی نا ستاءِ کرے۔ اوصدر شی جن پنگ نا بیلٹ اینڈ روڈ انیشی ایٹیو(بی آرآئی) نا اسہ اہم ءُ ڈٹ اسے نا وڑاٹ چین۔ پاکستان اقتصادی راہداری (سی پیک) نا اہمیت نا ستاءِ کرے و سی۔ پیک نا بروک آ ریسہ، ہراٹی پنچ پین راہداری تا ودکی ءِ کننگانے، نا سرسہب نفاذ کن چین اتون اواری کاریم ءِ برجاتخنگ نا است خواہی نا درشانی ءِ کرے۔ داگام گیج آتیان ہڑتوم آملک آتے اسہ اسیجائی آخبت کن پاکستان چین کمیونٹی ءِ سوگو کننگ اٹ کمک رسینگک۔ وزیراعظم کثیر الجہتی نظام ءِ سوگو کننگ کن صدر شی جن پنگ نا پکاعزم انا ستاءِ کرساپارے کہ پاکستان صدر شی جن پنگ نا تاریخی گام گیج، ہراٹی گلوبل گورننس انیشی ایٹیو، گلوبل ڈویلپمنٹ انیشی ایٹیو، گلوبل سیکورٹی انیشی ایٹیو و گلوبل سولائزیشن انیشی ایٹیو اوار ءُ، نا پورو مخ تفی ءِ کیک۔ وزیراعظم پارے کہ دا گام گیج اجتماعی جہانی خیرخواہی کن المی و علاقائی و جہانی امن، سوگوی و شونداری ٹی کمکار مریک۔ صدر شی جن پنگ پارے کہ چین اقتصادی شونداری نا غٹ بشخ آتیٹی پاکستان نا کمک ءِ برجاتخک، خاص کر داوڑاٹ وخت اس کہ سی پیک تینا ارٹ میکو ریسہ ٹی پترینگانے و اونا رداٹ پاکستان نا اہم انگا اقتصادی بشخ آتیا چکارکننگ ءِ۔ ہڑتوم آراہشونک پاکستان وچین نا نیام اٹ یکتا و بے مثل تعلقداری آ است جمی نا درشانی ءِ کرسا امنا کریر کہ اونا عکاسی ہڑتوم آ کنڈآتا کمکاری ءِ پین ودفنگ نا کمک اٹ مرے۔ ہڑتوم آ راہشونک اہم علاقائی و جہانی پیش رفت آ گپ وتران کرسا پاکستان وچین نا نیام اٹ خڑکی کمکاری ءِ برجاتخنگ آہم امنا کریر۔ وزیراعظم صدر شی جن پنگ ءِ بروک آ سال پاک۔چین سنگتی نا 75 می سال دے انا وخت آ پاکستان نا سرکاری دورہ ءِ کننگ کن تینا بے کچ پرخلوص سلہ نا ہم تجدید کرے۔
