بیجنگ ۔2ستمبر (اے پی پی):پاکستان ءُ چین ءَ اسٹریٹجک شریکداری ءَ را گیش مھکم کنگ ءِ واستہ وتی یکجائی جزم ءِ پدا پدر کتگ ءُ دو نیمگی کمک ءَ را گیش مھکم کنگ ءِ سر ءَ تپاک کتگ۔ مزن وزیر محمد شہباز شریف ءَ گشتگ کہ پاکستان دیمروئی ءِ مزنیں سفر ءَ چین ءِ گوما کار کنگ ءَ تیار انت، وھدیکہ صدر شی جن پنگ ءَ گشتگ سی پیک وتی دومی بھر ءَ داخل بوتگ، چین اقتصادی دیمروئی ءِ درستیں پڑاں پاکستان ءِ کمک ءَ برجاہ دار ایت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ بیجنگ ءِ گریٹ ہال آف پیپلز ءَ چین ءِ صدر شی جن پنگ ءَ گوں گند ءُ نند کتگ۔ بیان ءِ رد ءَ سک باز مہروانیں چاگرد ءَ برجم داشتگیں گند ءُ نند ءَ دوئیں رہشوناں پاکستان ءُ چین ءِ نیام ءَ وتی مھکمیں ءُ وھد ءِ آزمائش بوتگیں اسٹریٹجک کوآپریٹو شریکداری ءَ را گیش مھکم کنگ ءِ واستہ وتی یکجائی عزم ءِ پدا زور دات۔ مزن وزیر ءَ صدر شی جن پنگ ءَ را تیانجن ءَ شنگھائی کوآپریشن آرگنائزیشن ءِ سروک آنی دیوان ءِ سوبمندیں برجم دارگ ءِ سر ءَ مبارک بات دات ءُ اینٹی فاشزم ءِ جنگ ءَ مزنیں سوبمندی ءِ 80 سالی روچ ءِ سر ءَ مبارک بات دات۔ صدر شی جن پنگ ءِ دور اندیشیں سروکی ءِ توسیپ ءَ کنان ءَ مزن وزیر ءَ گوشت کہ پاکستان ءَ را چین ءِ سوبمندی آنی سر ءَ بے دروریں فخر اِنت ءُ اے مزنیں سفر ءِ سر ءَ چین ءِ گوما کار کنگ ءِ واستہ مدام تیار اِنت۔ مزن وزیر ءَ پاکستان ءِ علاقائی یکوئی، وت واجہی ءُ چاگردی ءُ اقتصادی دیمروئی ءِ واستہ چین ءِ بے دروریں کمک ءَ را ساڑات۔ آئی ءَ صدر شی جن پنگ ءِ بیلٹ اینڈ روڈ انیشیٹیو ءِ یک کلیدی منصوبگ ءِ رنگ ءَ چین ءُ پاکستان اقتصادی راہداری ءِ ارزشت ءَ را ساڑات ءُ سی پیک ءِ آیوکیں بھر ءِ سوبمندیں رنگ ءَ عمل کنگ ءِ واستہ چین ءِ گوما کار کنگ ءِ واھشت ءِ پدا زور دات کہ ایشی ءَ پنچ دگہ راہداری گیش کنگ بوتگ اَنت۔ اے گامگیج دوئیں ملک آناں یکجائی آیوکیں باندات ءِ واستہ پاکستان ءُ چین کمیونٹی ءَ را مھکم کنگ ءَ کمک رسیت۔ مزن وزیر ءَ کثیر جہتی نظام ءَ را مھکم کنگ ءِ واستہ صدر شی جن پنگ ءِ مھکمیں عزم ءِ توسیپ کنان ءَ گوشت کہ پاکستان صدر شی جن پنگ ءِ راجدپتری گامگیج آنی سرجمیں کمک ءَ کنت، ایشی ءِ تہ ءَ گلوبل گورننس انیشیٹیو، گلوبل ڈویلپمنٹ انیشیٹیو، گلوبل سیکورٹی انیشیٹیو ءُ گلوبل سیویلائزیشن انیشیٹیو ھوار اَنت۔ مزن وزیر ءَ گوشت کہ اے گامگیج اجتماعی جھان ءِ وشھالی ءِ واستہ المی اَنت ایشی ءَ چہ دمگی ءُ جھان ءِ امن، برجائی ءُ دیمروئی ءَ کمک رسیت۔ صدر شی جن پنگ ءَ گوشت کہ چین اقتصادی دیمروئی ءِ توامیں پڑ آنی تہ ءَ پاکستان ءِ کمک ءَ برجاہ دار ایت ھاسیں رنگ ءَ سی پیک وتی دومی بھر ءَ داخل بوتگ ءُ پاکستان ءِ مستریں اقتصادی شوبگ آنی سر ءَ دلگوشی دیگ ءَ اِنت۔ دوئیں راہشوناں پاکستان ءُ چین ءِ نیام ءَ بے دروریں ءُ بے دروریں سیادی ءِ سر ءَ دل یکیمی ءِ درشان کت ءُ اے گپ ءِ سر ءَ تپاک کت کہ اے دو نیمگی کمکی ءَ را گیش ودینگ ءِ تہ ءَ ھم گندگ بہ بیت۔ دوئیں راہشون آں ھاسیں دمگی ءُ جھان ءِ دیمروئی آنی سر ءَ گپ ءُ تران کنان ءَ پاکستان ءُ چین ءِ نیام ءَ نزیکیں کمک ءِ برجاہ دارگ ءِ سر ءَ ھم تپاک کتگ۔ مزن وزیر ءَ صدر شی جن پنگ ءَ را پاکستان ءُ چین دوستی ءِ 75 سالی روچ ءِ درگت ءَ آیوکیں سال ءَ پاکستان ءِ سرکاری تر ءُ تاب ءِ واستہ وتی مخلصیں دعوت ءِ ھم نوک کت۔
