اسلام آباد۔ 16نومبر (اے پی پی) مسکوہی سفیر شاہد ملک پارینے کہ مودی نا پالیسیک ہمیشہ پاکستان و مسلمان تا برخلاف مسنو۔ ریڈیو پاکستان تون ہیت وگپ کرسا اوپارے کہ مودی ناتعلق ہندن ئُ سیاسی پارٹی اسے آن ئِ ہرانا ہر پالیسی مسلمان و پاکستان نا برخلاف مسنے و ہندا پالیسی تا سوب او گچین کاری تیٹی ہم سرسہبی دوئی کیک۔ اوپارے کہ ہراوخت آن مودی برسراقتدار اٹی بسنے ورکنگ باﺅنڈری و لین آف کنٹرول آ بے چیٹیک زیات مسنو۔ شاہد ملک تدوک آ دے بھمبر سیکٹر آ پاک فوج انا ورناتا شہیدی ئِ خراج تحسین پیش کرسا پارے کہ داوڑنا واقعہ غاک ہڑتوم آ ملک آتے کن خطرناک ثابت مننگ کیرہ ۔ اوپارے کہ اسہ کنڈبھارت تینے دنیا نابھلا جمہوریت و آجوئی رائے نا علمبردار پائک وخت اس کہ ایلو کنڈا اونا میڈیا و دانشور آک ہی گڑاس پارہ ہرا بھارتی حکومت پائک۔ مسکوہی سفیر پارے کہ بھارتی میڈیا و دانشور آتے مثبت صحافت کننگ نا گرج ئِ انتئے کہ اِرا ایٹمی ملک آتا نیام اٹ جنگ آن ہڑتوم آملک آتے نسخان رسینگ انگ کیک۔ اسہ سوج اسے نا ورندی ئِ ترسا اوپارے کہ اصل ہیت پاک چین اقتصادی راہداری نا سوب پاکستان اٹی مروک آ شونداری بھارت آن برداشت مفننگ ئِ و او پاکستان نا حالیت آتے خراب کننگ، اونا شونداری نا کسر اٹی اڑاند بٹنگ نا کوشست کننگ ئِ۔
