نئی دہلی۔ 26اپریل (اے پی پی) سیکرٹری خارجہ اعزاز احمد چوہدری سے شنبے آ داڑے بھارت نا خارجہ سیکرٹری ڈاکٹر ایس جے شنکر تون اوڑدہی کرے و وزیراعظم محمد نواز شریف نا وژن نا رداٹ بھارت تون غٹ ہمسایہ ملک آتون دوستانہ تعلقداری تے کن پاکستان نا عزم انا اعادہ ئِ کرے۔ خارجہ سیکرٹری اعزاز احمد چوہدری ہارٹ آف ایشیاءاستنبول عمل نا بڑزکو کمامدارآتا دیوان اٹی شرکت کن تدوک آ دے بھارت آ سرمس۔ دفترخارجہ نا ترجمان نفیس ذکریا راجی رابطہ نا ویب سائٹ آ تینا بیان اٹی پارینے کہ دااوڑدہی آن ہڑتوم آ کنڈآتا تعلقداری تا تناظر اٹی مروک آ ساڑی آ پیش رفت آن بابت درشانِ خیال نا اسہ مفید ئُ موقع اس میسر بسنے۔ اوپارے کہ جموں و کشمیر تون اوار غٹ ایسر نا چاری ویل آتیا درشانِ خیال کننگا۔ خارجہ سیکرٹری دا ہیت آ زورشاغا کہ تنازع کشمیر اسہ اہم ئُ معاملہ اسے ہراکہ اقوام متحدہ نا سلامتی کونسل نا قرارداد و کشمیری الس نا است خواہی نا وڑوڈول منصفانہ ایسری نا متقاضی ئِ۔
