بنجائی وزیر داخلہ اسلام آباد پولیس نا پوسکن کمانڈ، کنٹرول، کمیونیکیشن اینڈ کوآرڈینیشن سینٹر نا بناءِ کرے

اسلام آباد۔ 08 ستمبر (اے پی پی)بنجائی وزیر داخلہ محسن نقوی اسلام آباد پولیس نا پوسکن آکمانڈ، کنٹرول، کمیونیکیشن اینڈ کوآرڈینیشن سینٹر نا بناءِ کرے۔ پوسکن آکمانڈ اینڈ کنٹرول سینٹر آن آئی جی اسلام آباد تینا دفتر آن سیف سٹی، پولیس آپریشنز و شار اٹ امن و ایمنی نا حالیت آتے براہِ راست مانیٹر و کمانڈ کننگ کیک ۔ دود آن تران کرسا بنجائی وزیر داخلہ محسن نقوی پارے کہ دا پوسکن آسینٹر آن اسلام آباد پولیس نا کمانڈ، مانیٹرنگ، کوآرڈینیشن و زوت فیصلہ سازی نا نظام اٹ نمان گچینی بریک۔ سیف سٹی تون اوار پولیس نا غٹ اہم آپریشنل نظام اسہ مرکزی کمانڈ اینڈ کنٹرول پلیٹ فارم اسے تون منسلک مریک ،ہروڑنا ہلہلہ ئی یا سکیورٹی نا حالیتآتیٹی آئی جی اسلام آباد براہِ راست حالیت آتے مانیٹر کرسا زوت پرمان جاری کننگ کیک ۔ وزیر داخلہ محسن نقوی پارے کہ پوسکن آاے آئی و ٹیکنالوجی بیسڈ سسٹم آتیان پولیس نا کارکڑد، رسپانس ٹائم و فیلڈ فورس نا مانیٹرنگ پین گچینمریک۔ بنجائی وزیر داخلہ سینٹر نا جتا جتا بشخ آتا معائنہ ءِ کرے و پوسکن آ مانیٹرنگ و کمانڈ سسٹم نا جاچ ءِ ہلک۔ بنجائی وزیر داخلہ ءِ سیف سٹی تون مربوط نظام، پولیسآپریشن ، فیلڈ فورس نا مانیٹرنگ، ایمرجنسی رسپانس وپوسکن آاے آئی بیسڈ ٹیکنالوجی نا بارواٹی حوال تننگا۔ وزیر داخلہ پارے کہ پوسکن آسینٹر نا بنداوی مسخت آئی جی اسلام آباد ءِ اسہ جاگہ سے آن مچ آ اسلام آباد پولیس نا گچین کمانڈ و مانیٹرنگ نا آسراتی تننگ ءِ ۔ دا پوسکن آنظام آن پولیس نا جتا جتا یونٹ آتا نیام اٹ رابطہ و کوآرڈینیشن پین گچینمریک ،ہروڑنا واقعہ یاہلہلہ ئی حالیتآتیٹی وخت آ معلومداری، زوت فیصلہ سازی و ترند رفتار پولیس رسپانس ممکن مریک۔ محسن نقوی پارے کہ پوسکن آٹیکنالوجی نا کمک اٹ پولیس نا کمانڈ، مانیٹرنگ و احتساب نا نظام ءِ پین سوگو کننگ ءِ ۔ دا سینٹر آن فیلڈ اٹ پولیس نا کارکڑد نا گچینچاروکی ہم ممکن مریک۔ شاری تا رکھ، پولیس نا کارکڑد اٹ گچینی و اسلام آباد اٹ امن و ایمنی نا قیام ننا اولیت ءِ ۔ دا وخت آ آئی جی اسلام آباد پولیس، ڈی جی آئی جی اسلام آباد و ایلو تعلقدار آفیسرآک ہم ساڑی ئسر۔