اسلام آباد۔ 20اکتوبر (اے پی پی) پاک امریکہ فورم نا چیئرمین ڈاکٹر اشرف طور پارینے کہ مچ آ دنیا ٹی داہیت ثابت مسنے کہ بھارت اسہ دہشت گرد ملک اسے۔ ریڈیو پاکستان نا پروگرام نقطہ نظر اٹی واشنگٹن تون ہیت وگپ کرسا اوپارے کہ پاکستان مسلم لیگ (ن) نا حکومت نا گچین سفارتکاری آن بھارت نا اصل دروشم دنیا نامون آ بسنے و بھارت نا کنڈآن پاکستان آ خلوک آ غٹ دوبہ غاک دروغ انا پلندہ ثابت مسنو۔ اوپارے کہ بھارت مقبوضہ کشمیر اٹی بیدادی و بربریت کاٹم آن گدرینگ انگ ئِ ، سوشل میڈیا و پاکستان نا گچین سفارتکاری آن دنیا نا مون آ داہیت ثابت مسنے کہ بھارت اسہ دہشت گرد ملک اسے۔ اومثال ترسا پارے کہ امریکہ ٹی ہم بھارت آنبار اسہ کانگرس مین اس پاکستان ئِ دہشت گرد اسٹیٹ گوندنگ نا کوشست کریسس ہرانا وائٹ ہاﺅس پبی مخالفت کرسا بے سہب کریسس۔ اوپارے کہ بھارت تینا حرکت آتا سوب دنیا ٹی تنیا مسنے۔ روس، چین و میانمار ہم اودے ورندی ترسا پارینو کہ او پاکستان تون تفوک ئُ۔ اوپارے کہ پاکستان اٹی بھارت نا دہشت گردی ٹی اوار مننگ و اوفتا جاسوس نا ہلنگ ہندن ئُ دلیل ئُ ہرافتا سوب بھارت دہشت گرد ثابت مریک۔ ڈاکٹر اشرف پارے کہ بھارت ئِ کشمیر نا ویل انا ایسری کن مذاکرات نا میز آ بروئی مریک۔ پاک چین سنگتی نا بابت چست کروک آ سوج انا ورندی ئِ ترسا پارے کہ ہڑتوم آ ملک آتا سنگتی لازوال ئِ و ہمیشہ سلک و پاک چین اقتصادی راہداری دا سنگتی نا ثبوت ئِ۔ اوپارے کہ چین پاکستان اٹی بھلو زرکاری اس کرسا دنیا ٹی ننا عزت افزائی ئِ کرینے۔
