کسانیں دکاندار آناں ٹیکس نیٹ ءِ تہ ءَ آرگ ءِ ھاترا دیم ءَ آؤرتگیں اسکیم ءِ سر ءَ انجمن ءِ نیمگ ءَ چہ تاجر آنی کمک ءَ چہ دیم ءَ آرگ بیت، بجٹ ءِ تہ ءَ درستیں تبک ءُ شوبگ آناں ریلیف ءِ پجارینگ ءِ کوشست کنگ بوتگ، وزیر مملکت ءِ پریس بریفنگ

اسلام آباد۔17جون  (اے پی پی): ھزانگ ءُ آمدنی ءِ وزیر ءِ مملکت بلال اظہر کیانی ءَ گوشت کہ کسانیں دکاندار آناں ٹیکس نیٹ ءَ آرگ ءِ واستہ دیم ءَ آؤرتگیں اسکیم ءِ سر ءَ انجمن ءِ نیمگ ءَ سوداگر آنی ھمکوپگی ءَ عمل کنگ بیت۔ بجٹ ءِ تہ ءَ درستیں تبک ءُ شوبگ آناں ریلیف ءِ پجارینگ ءِ کوشست کنگ بوتگ ءُ ما لوٹ ایں کہ معیشت ءَ را پائیداریں رنگ ءَ دیم ءَ برگ بہ بیت۔ چار شمبے ءِ روچ ءَ وفاقی وزیر اھوالکاری ءُ شنگ کاری عطا اللہ تارڑ ءِ گوما آیوکیں مالی سال ءِ وفاقی بجٹ ءِ کلیدی نکات آنی سر ءَ سوشل میڈیا ءَ را بریفنگ کنان ءَ وزیر مملکت ءَ گوشت کہ بجٹ یک ریلیف بجٹ اِنت کہ ایشی ءِ بنیات ءَ پگار داریں تبک، کشت ءُ کشاری، زالبول، ورنا، ای صنعت ءُ راجی تک ءَ را دیمروئی دیگ ءِ گامگیج آنی سر ءَ کار کنگ بیت۔ بجٹ ءِ تہ ءَ ھاٹیگ ءِ شوبگ ءَ را ھاسیں اولیت دیگ بوتگ ۔ ایوک ءَ پی ایم یوتھ پروگرام ءِ تہ ءَ کشت ءُ کشاری ءِ واستہ 110ارب کلدار ءِ فنڈ ایر کنگ بوتگ۔ زرعی مشینری ءِ سرا ڈیوٹی ءِ تہا واضح کمی بوتگ۔ ارب کلدار ءِ برآمداتی فنانس اسکیم ءِ یک بہرے زراعت ءِ واستہ بیت۔ زرعی منصوبگ آنی واستہ دیمروئی بجٹ ءَ چہ ھم 4 ارب کلدار ایر کنگ بوتگ۔ وزیر مملکت ءَ گوشت کہ حکومت ءَ روزگار ءِ موہ آنی تہ ءَ گیشی ءِ واستہ گامگیج کتگ ءُ الس آناں ممکنہ ریلیف پجارینگ ءِ کوشست کتگ۔ اے یک انچیں بجٹے کہ ایشی ءِ تہا راج ءِ واستہ ریلیف است انت۔ ما لوٹاں کہ معیشت ءَ را پائیدار رنگ ءَ دیم ءَ برگ بہ بیت۔ یک جستے ءِ سر ءَ آئی ءَ گوشت کہ وانگ ءُ زانگ ءُ جان سلامتی صوبائی جیڈھ اَنت البت فیڈریشن ءَ ھم وتی کوشست آناں ھمگرنچ کتگ۔ کردار ءَ را جوانیں رنگ ءَ پیلو کنگ بوھگ ءَ اِنت۔ آئی ءَ گوشت کہ بی آئی ایس پی ءِ واستہ 838ارب کلدار ءِ فنڈ ایر کنگ بوتگ، بی آئی ایس پی ءِ چیر دستی ءَ یک کروڑ ءَ چہ گیش ھاندان آناں زالبول آنی کمک کنگ بوھگ ءَ اِنت۔ آئی ءَ گوشت کہ آیوکیں مالی سال ءِ وفاقی بجٹ ءَ زالبول آنی وشھالی ءِ واستہ بازیں گامگیج چست کنگ بوتگ، زالبول آنی تولیدی جان سلامتی ءَ را گہتر کنگ ءِ واستہ سیلز ٹیکس ءَ استثنیٰ دیگ بوتگ۔ وزیر ءِ مملکت ءَ گوشت کہ سوداگر ءُ دکاندار آناں ٹیکس نیٹ ءَ آرگ ءِ واستہ شور ءُ سلاھ ءِ تہ ءَ گامگیج زورگ بوھگ ءَ انت، گوست ءِ سرکار آں کوشست کتگ بلے سوبمند نہ بوتگ انت۔ اے وھد ءَ 3.5 ملین دکاندار ٹیکس نیٹ ءَ چہ در اَنت، آھانی واستہ ٹیکس نیٹ ءَ آرگ ءِ اسکیم ءِ دیم ءَ آرگ بوتگ، ما ٹریڈرز ایسوسی ایشن ءِ گوما یکجاہ ایشی ءَ را سرجم کن ایں ۔ وزیر مملکت ءَ گوشت کہ اوورسیز پاکستانی ملک ءِ معیشت ءِ ریڑھ ءِ ھڈ اَنت، اوورسیز پاکستانی آناں آسراتی پجاری حکومت ءِ اولی ترجی آنی تہ ءَ ھوار اِنت۔ آئی ءَ گوشت کہ اوورسیز پاکستانی آنی آسراتی ءِ واستہ پاکستان ریمیٹنس انیشیٹیو ءِ چیر دستی ءَ ریمیٹنس ءِ سر ءَ سبسڈی ءِ شرح ایر کنگ بوتگ۔