گوادر ءَ گرین بس سروس ءِ بندات کنگ ءِ واستہ المی انتظامی بندوبست کنگ بوھگ ءَ انت سیکرٹری ٹرانسپورٹ بلوچستان

کوئٹہ۔ 17 جون (اے پی پی): امیر جماعت اسلامی بلوچستان ءُ صوبائی اسمبلی ءِ باسک مولانا ہدایت الرحمن بلوچ ءَ گوں سیکرٹری ٹرانسپورٹ بلوچستان محمد حیات کاکڑ  ءَ سول  سیکرٹریٹ کوئٹہ ءِ کارگس ءَ گند ءُ نند کت۔ گند ءُ نند ءَ ضلع گوادر ءَ پبلک ٹرانسپورٹ ءِ جیڈھ ءُ گرین بس سروس ءِ بنگیج ءِ بابت ءَ سرجمیں گپ ءُ تران کنگ بوت۔ مولانا ہدایت الرحمن بلوچ ءَ گوشت کہ بلوچستان ءِ دراہیں مزنیں ضلع آناں نوکیں وھد ءَ ٹرانسپورٹ ءِ آسراتی، شاہراہ، ٹرک، ٹرانسپورٹر ءُ مساپر آنی ضلورت انت۔ بجٹ ءَ درستیں پڑ آنی دیمروی، امن ھاسیں رنگ ءَ وانگ ءُ زانگ ءُ جان سلامتی ءِ سر ءَ حاصیں دلگوشی دیگ بہ بیت۔ گوادر شہر ءِ گیش بوھوکیں آبادی ءُ شہری لوٹانی رد ءَ نوکیں ءُ کوالٹی ءِ ٹرانسپورٹ ءِ سک باز ضلورت اِنت۔ آئی ءَ لوٹ کتگ کہ گوادر ءَ گرین بس سروس زوتاں چہ زوت چالو کنگ بہ بیت تانکہ شہری، نودربر، ملازمت ءُ زالبول ایمن، ارزان ءُ  یک شلیں سفری آسراتی بہ رس اَنت۔ گند ءُ نند ءَ اے گپ ءِ سر ءَ تپاک کنگ بوت کہ گوادر ءَ گرین بس سروس ءِ بنگیج ءِ واستہ عملی گامگیج ترند کنگ بنت ءُ سک زوت اے منصوبگ ءِ سر ءَ پیشرفت کنگ بیت۔ سیکرٹری ٹرانسپورٹ محمد حیات کاکر ءَ اے موہ ءِ سر ءَ دل یکیمی دات کہ محکمہ ٹرانسپورٹ گوادر ءَ گرین بس سروس ءِ بنگیج ءِ واستہ المی ئیں بندوبست سرجم کنگ ءَ انت ءُ الس ءَ را نوکیں سفری آسراتی پجاری ءِ واستہ گامگیج کنگ بوھگ ءَ انت۔ مولانا ہدایت الرحمن بلوچ ءَ گوشت کہ گرین بس سروس ءِ بندات کنگ ءَ چہ نا ایوک ءَ شہری آناں شریں سفری آسراتی رس ایت بلکینگ ءَ شہر ءَ ٹریفک ءِ جیڈھ ھم کم بنت ءُ الس ءَ شرپداریں سفری چاگردے پجارینگ بیت۔ آئی ءَ اے امیت سہرا کت کہ اے منصوبگ گوادر ءِ شہری دیمروئی ءُ سرکاری آسراتی آنی تہ ءَ گیشی ءِ نیمگ ءَ یک ھاسیں گامگیج ءِ ثابت بیت۔