اسلام آباد۔ 20اکتوبر (اے پی پی) پاکستان مسلم لیگ (ن) نا چیئرمین و سینیٹ نا قائمہ کمیٹی امور کشمیر نا باسک راجہ ظفرالحق پارینے کہ مقبوضہ کشمیر اٹی ساڑی آ بیدادی آن گڈ جہانی کہول آ بھارت ئِ دا ظلم و ستم آن توننگ نا احساس زیات مننگ ئِ ، تینٹ بھارت آن ہم حکمران بی جے پی ئِ ہلسا ایلو سیاسی جماعت آتا کنڈآن حکومت نا پالیسی ئِ تنقید نا نشانہ جوڑ کننگ انگ ئِ ، بھارتی وزیراعظم نریندر مودی دباﺅ نا گواچی ئِ ، برکس دیوان اٹی بھارت ئِ پاکستان نا برخلاف ہچ ئُ پذیرائی اس ملتو۔ پنچ شنبے آ ”اے پی پی“ تون ہیت وگپ کرسا راجہ ظفرالحق پارینے کہ مقبوضہ کشمیر اٹی بھارت نا کنڈآن برہان وانی نا شہیدی آن گڈ بیدادی نا چرجوئی زیات مسنے ، پیلٹ گن آتا کاریم اٹ اتنگ آن کشمیری تے بینائی آن محروم کننگ انگ ئِ ۔ زالبول نا عصمت دری ئِ کننگ انگ ئِ ، انسانی حق انا سنگین پامالی کننگ انگ ئِ اوکان گڈ داسہ جہانی کہول آ دا احساس زیات مننگ ئِ کہ ہندوستان ئِ مقبوضہ کشمیر اٹی دا بیدادی و ظلم و ستم آن توننگے۔ اسہ سوج اسے نا ورندی ٹی اوپارے کہ اسلامی ملک آتا تنظیم او آئی سی نا ساڑی آ دیوان اٹی مقبوضہ کشمیر اٹی انسانی حق انا خلاف ورزی تا برخلاف پبی قرارداد منظور کننگانے ہراٹی مقبوضہ کشمیر اٹی انسانی حق انا خلاف ورزی تا جاچ اکن فیکٹ فائنڈنگ مشن ئِ گدریفنگ نا سلاہ ہم اوارے۔ اوپارے کہ داقرارداد اٹی خواست کننگانے کہ اقوام متحدہ نا جنرل اسمبلی نا قرارداد آتا رداٹ کشمیری تے حق خودارادیت تننگے۔ راجہ ظفرالحق پارے کہ مقبوضہ کشمیر نا ساڑی آ حالیت و بھارتی بیدادی تیان گڈ داسہ تینٹ بھارت ناتہہ آن سیاسی جماعت آک ہم داپالیسی ئِ تنقید نا نشانہ جوڑ کننگ ئِ و اودے مسترد کننگ ئِ۔ بھارتی وزیراعظم بھاز دباﺅ ٹی ئِ۔ اسہ سوج اسے نا ورندی ٹی او پارے کہ تدینگوک آ وخت آن کشمیر نا بابت ہرا پالیسی ئِ حکومتی کہول آ جوڑ کننگانے اوڑآ داسہ ترندی اٹ عمل مننگ ئِ۔ تہہ نا وڑاٹ دیوان اڈ ترفسا پالیسی و کارکرڈ نا جاچ ئِ ہلنگ انگ ئِ۔ اوپارے کہ وزیراعظم محمد نواز شریف نا کنڈآن جہانی کہول آ کشمیر نا ویل ئِ تالان کننگ و مقبوضہ کشمیر نا ساڑی آ حالیت آتیا جہانی توجوہ ئِ مبذول کرفنگ کن دنیا نا اہم ملک آتیٹی پارلیمانی ڈل گدریفنگ نا چرجوئی جاری ئِ۔
