اسلام آباد۔ 20اکتوبر (اے پی پی) بنجائی وزیر خزانہ سینیٹر اسحاق ڈار نا کماشی ٹی بروک آ ہفتہ کن کیہی بین الاقوامی ایونٹس آتا بست وبند آتا جاچ اکن اسہ دیوان اس اڈ ہلک۔ دیوان اٹی بروک آ ہفتہ انٹرنیشنل مانیٹری فنڈ (آئی ایم ایف) نا منیجنگ ڈائریکٹر کرسٹین لار یگر دو ایشیائی شونداری بینک انا صدر تاکی ہیکو نکاﺅ نا دورہ پاکستان آن بیدس نیامی ایشیائی علاقائی اقتصادی تعاون(سی اے آر ای سی ) نا 15می وزارتی کانفرنس نا اسلام آباد اٹی اڈتننگ نا بابت بست و بند آتا جاچ ئِ ہلنگا۔ وزارت خزانہ و اقتصادی امور ڈویژن نا کمامدارآک دا بابت تیاری تا بارواٹی بنجائی وزیر خزانہ سینیٹر اسحاق ڈار ئِ بریفنگ تسر ۔ بنجائی وزیر پارے کہ نیامی ایشیائی علاقائی اقتصادی تعاون(سی اے آرای سی) نا 15می وزارتی کانفرنس باسک ملک آتے تین پہ تینی مفاد اٹی کمکاری ئِ مون آ دننگ نااہم موقع فراوان کیک۔ وزارتی کانفرنس اٹی میزبان پاکستان آن بیدس اوغانستان، آذربائیجان، چین، قزاخستان ، منگولیا، قرغزستان، تاجکستان، ترکمانستان ، ازبکستان ، جارحیا آن ڈل آک شرکت کیرہ۔ اسحاق ڈار پارے کہ بڑزکو کہولی دورہ و وزارتی کانفرنس بین الاقوامی شونداری پارٹنرز نا پاکستان نا معیشت آ پت انا عکاس ئِ۔ اوپارے کہ حکومت پائیدار شرح نمو تون اوار اوار ملک ئِ بین الاقوامی زرکارآتے کن جوڑ کننگ کن پرعزم ئِ۔ او غٹ تعلقدار وزارت و محکمہ غاتے پارت کرے کہ دا بین الاقوامی ایونٹس آتا سرسہبی کن مربوط انداز اٹ کاریم کیر۔ دیوان اٹی وزارت خزانہ و اقتصادی امور ڈویژن نا سینئر کمامدار آک ہم شرکت کریر۔
