پانامہ پیپرز نا معاملہ داسا الیکشن کمیشن ، لاہور ہائی کورٹ و سپریم کورٹ نا مون آ اتنگانے، آئین نا پاسداری ، کانود نا حکمرانی و پورو شفافیت آ کامل یخین تخوہ
وزیراعظم محمد نواز شریف نا بیان
اسلام آباد۔ 20اکتوبر (اے پی پی) وزیراعظم محمد نواز شریف پانامہ پیپرز نا بابت آن سپریم کورٹ اٹی کارروائی نا بناءنا است اٹ خیرمقدم ئِ کرسا پارینے کہ پانامہ پیپرز نا معاملہ داسہ الیکشن کمیشن ، لاہورہائی کورٹ و سپریم کورٹ نا مون آ اتنگانے، ای آئین نا پاسداری ، کانود نا حکمرانی و پورو شفافیت آ کامل یخین تخوہ ، الس نا عدالت تو پے درپے فیصلہ صادر کننگ اٹی ئِ ، جوان مریک کہ عدالت نا فیصلہ نا انتظار ئِ ہم کننگے۔ پنچ شنبے آ ایوان وزیراعظم نا میڈیا آفس نا کنڈآن جاری بیان نا رداٹ وزیراعظم محمد نواز شریف پارے کہ پانامہ رپورٹس نا بناءہی آن و اپوزیشن نا ہر خواست آن مست او سپریم کورٹ نا معزز ریٹائرڈ جج صاحب آتیا تالان کمیشن نا پڑو ہندا جوزہ تون کریسس کہ شفاف جاست وپاست نا کمک اٹ اصل حق قوم انا مون آ برے۔ اونا ورندی ٹی اسٹ انگا خواست دا مون آ بس کہ چیف جسٹس آف پاکستان نا سروکی ٹی حاضر سروس جج صاحب آتیا تالان کمیشن اس جوڑ کننگے۔ وزیراعظم پارے کہ او خُلنگ آن بیدس دا خواست ئِ ہم امنا کرے ولے اوڑتون اوار ہی ٹی او آر زنا تنازعہ ئِ شروع کرسا سپریم کورٹ نا کسر اٹی اڑاند آتے شاغنگا، سپریم کورٹ نا کنڈآن چست کروک آ ٹک آتے مون آ تخسا حکومت متفقہ ٹی او آرز نا تیاری کن اسہ پارلیمانی کمیٹی اس اڈ تس۔ کمیٹی نا باسک آتا کچ انا تعین کرسا پارلیمان اٹی حکومت نا صفا عددی برتری نا باوجود اپوزیشن ئِ بریبر نمائندگی تننگا ولے ننا دا غٹ تر کوشست آتا باوجود اتفاق رائے مننگ کتو، ہندا وخت آ حکومت سپریم کورٹ چھٹی ئِ مون آ تخسا 1956ءنا کورٹ آف انکوائری ایکٹ ئِ بدل کننگ و کمیشن ئِ پین گچین و طاقتور جوڑ کننگ کن اسہ بل اس پارلیمنٹ اٹی پیش کرے ولے پدریسہ منفی رویہ جاری تخسا مسلمہ آئینی و کانودی گرج آتا برعکس اسہ متوازی بل اس پیش کننگا۔ وزیراعظم پارے کہ دا سرحال آ دُوارہ قوم اتون تران کننگ آن بیدس اوقومی اسمبلی نا دیوان اٹی ہم تینا تفصیلی موقف ئِ پیش کرے ولے ارٹ میکو کنڈآن حکومت نا نیک نیتی آ مبنی غٹ کوشست آتے لتاڑسا اونا شفاف و بے لاگ جاست و پاست انا کسراٹی پدریسہ اڑاند شاغنگا۔ اوپارے کہ پانامہ پیپرز نا معاملہ داسہ الیکشن کمیشن ، لاہور ہائی کورٹ و سپریم کورٹ نا مون آ اتنگانے او آئین نا پاسداری ، کانود نا حکمرانی و پورو شفافیت آ کامل یخین تخک ، الس نا عدالت تو پے درپے صاد کننگ ئِ جوان مریک کہ عدالت نا فیصلہ نا انتظار ئِ ہم کننگے۔
