پاکستان نا مالیاتی بشخ جہانی زرکارآتے کن بے شمار وارخواہی پیش کیک، تیان گولی
اسلام آباد۔ 19اکتوبر (اے پی پی) وزیراعظم محمد نواز شریف پارینے کہ پاک چین اقتصادی راہداری کیہی شونداری ڈٹ آتا مجموعہ ئِ، ہرافتے آن ملک و گیشتر ڈیہہ ٹی شونہالی و شون بریک۔ اوداہیت ئِ بینک آف چائنا نا بورڈ آف ڈائریکٹر نا چیئرمین تیان گولی تون چارشنبے آ ایوان وزیراعظم اٹی ہیت وگپ کرسا پارے۔ وزیراعظم پارے کہ پاک چین سدابہار تعلقداری مشترکہ اصول و مفادات آتیا مبنی ئُ ہرا کیہی بشخ آتیٹی کمکاری نا بنداو ئِ استوار کیرہ۔ سیکورٹی، واپار و بنداوی ڈھانچہ نا شون اٹی پاکستان کن چین نا پبی مخ تفی ئِ تالان کرسا وزیراعظم پارے کہ پاکستان و چین مشترکہ آخبت نا حامل ئِ و پاک چین اقتصادی راہداری ہر پیشن نا ملک اتون غٹ آن بھلا جامع ڈٹ ئِ۔ اوپارے کہ پاکستان اٹی اسہ متحرک بینکاری نظام اس خننگک ہرا کٹیا نا بڑزکچ ، گچین لیکوڈیٹی و سوگو ساکھ ہلکونے۔ بینکاری نا بشخ مسکوہی پنچ سال آن زہمی کن سالانہ اوسط شرح نمو تون شون ہلنگ ئِ۔ وزیراعظم پارے کہ سوگو زرجاتی بنداو، اثاثہ جات و کٹیا پذیری ٹی شون و شان نمو و بین الاقوامی معیار آتا پیروی پاکستان نا بینکاری نا بشخ ئِ زرکارآتے کن ڈیہہ ٹی بھاز مسابقانہ حیثیت ترفینے۔ داکان بیدس براہ راست درملکی زرکاری ، بین الاقوامی زرکارآتا است خواہی ہم بینکاری نا بشخ اٹی زرکاری نا کچ آن عیاں ئِ ہرانا مشاہدہ یو بی ایل، کے بی ایل و ایچ بی ایل نا ساڑی آ سودآتیان مریک۔ وزیراعظم پارے کہ پاکستان نا بینکاری بشخ اٹی پیشن نا ملکیت پدریسہ و قابل ذکر وڑاٹ ودانے۔ پاکستان نا حکومت ساڑی ہی ٹی چائنہ ڈویلپمنٹ بینک اتون 700ملین ڈالر فنانسنگ سمجھوتہ کرینے ہرا چینی بینکاری صنعت تون داڈول نا اولیکو رابطہ ئِ ۔ تیان گولی ملک ئِ شون نا کسر آ بٹنگ و معیشت نا بحالی آ وزیراعظم نا ویژن نا ستائِ کرے۔ اوپاکستان نا فعال بینکاری بشخ انا ستائِ کرسا پارے کہ پاکستان نا مالیاتی بشخ جہانی زرکار آتے کن بے شمار وارخواہی پیش کیک۔ اوپارے کہ سی پیک پاکستان و ڈیہہ نا خلقت آتے کن بھلو اقتصادی فائدہ اسے نا حامل ئِ ۔
