اسلام آباد۔ 19اکتوبر (اے پی پی) پبلک اکاﺅنٹس کمیٹی (پی اے سی ) نیشنل انشورنس کمپنی (این آئی سی ایل) نا چیئرمین نا ساڑی مفننگ آ برہمی نا درشانی ئِ کرسا اسپیکر ئِ چھٹی اس نوشتہ کننگ و دامعاملہ غا اسپیکر تون ہیت کننگ کن 4باسکی ذیلی کمیٹی اس اڈ تسر۔ دیوان چارشنبے آ پارلیمنٹ ہاﺅس اٹی پی اے سی نا چیئرمین سید خورشید احمد شاہ نا کماشی ٹی مس ہراٹی کمیٹی نا باسک میاں عبدالمنان م، شیخ رشید احمد، صاحبزادہ نذیر سلطان ، جنید انوار چوہدری، شاہدہ اختر علی، سردار عاشق حسین گوپانگ و محمود خان اچکزئی آن بیدس تعلقدار سرکاری ادارہ غاتا بڑزکو کمامدارآک شرکت کریر۔ دیوان اٹی این آئی سی ایل آن تعلقدار معاملہ غاتیا بریفنگ تروئی ئسک ولے این آئی سی ایل نا چیئرمین ساڑی ہلوکہ۔ این آئی سی ایل نا کمامدار آک پاریر کہ چیئرمین نا ہائیکورٹ اٹی پیشی ئس ہرانا سوب او دیوان اٹی بننگ کتو۔ سید خورشید احمد شاہ پارے کہ ننے ہائیکورٹ اٹی پیش نا نوٹس ئِ نشان تننگے، اگہ ننے نوٹس ئِ نشان تننگ تو تو دیوان ئِ ملتوی کیوہ و بریفنگ نا موکل تفننگک۔ سید خورشید احمد شاہ اونا بارواٹی اسپیکر ئِ چھٹی اس نوشتہ کننگ نا پارت کرے و معاملہ غا اسپیکر تون ہیت کننگ کن محمود خان اچکزئی، سید نوید قمر، میاں عبدالمنان و سردار عاشق حسین گوپانگ آ تالان 3باسکی کمیٹی اس ہم اڈ تس اوکان گڈ او دیوان ئِ ملتوی کرے۔
