اسلام آباد۔ 19اکتوبر (اے پی پی) پاکستان کونسل آف چین نا ایگزیکٹو ڈائریکٹر فضل الرحمان پارینے کہ چین خواہک کہ دنیا دہشت گردی نا برخلاف پاکستان نا قربانی و جہد نا شرف ئِ کے۔ ریڈیو پاکستان تون ہیت وگپ کرسا اوپارے کہ بھارت پاکستان اٹی سرجیکل اسٹرائیک و اوڑی جلہو کون آ بے بنداو و دروغ نا دوبہ پاکستان آ خلنگ نا کوشست آتیٹی اختہ ئِ۔ چین دہشت گرد و انتہاپسندی نا برخلاف ئِ و چین نا دفتر خارجہ بھارت نا کنڈآن پاکستان آ خلوک آ غٹ دوبہ غاتے مسترد کرینے ہراڑآن بھارت ئِ بوز اٹ کنوئی تمانے۔ اوپارے کہ چین دہشت گردی نا ہمیش مذمت ئِ کیک و اونا پاننگ ئِ کہ دہشت گرد آتا ہچ ئُ مذہب اس اف و اونا آڑاٹی ہر علاقہ بننگ کیک۔ چین نا پاننگ ئِ کہ پاکستان دہشت گردی نا برخلاف جنگ اٹی بھاز قربانی تسنے و دنیا ئِ اونا قربانی و جہد نا شرف ئِ کروئی مرے۔ داوخت آ ساڑی مسکوہی سیکرٹری خارجہ نجم الدین شیخ پارے کہ بھارت سارک کانفرنس اٹی شرکت آن نہ من مس تانکہ او مقبوضہ کشمیر اٹی کروک آ انسانی حق انا پامالی تا بابت سارک تون اوار دنیا ئِ جوابدہ مف و دنیا نا توجوہ ئِ کشمیر نا ویل و ہموڑے کروک آ بیدادی آن اسہ پلوکننگ کے۔ اوپارے کہ نریندر مودی چین نا دفتر خارجہ نا کنڈآن سہی ورندی آن گڈ روس ئِ تینتون اوار کننگ نا کوشست کرے ہراڑآ صدر پیوٹن نا پاننگ ئِ کہ او دہشت گردی نا برخلاف پاکستان نا مخ تفی ئِ برجاتخک تانکہ دہشت گردی نیامی ایشیاءنا ملک آتیٹی تالان مننگ کپ۔
