راجہ محمد ظفر الحق پارٹی نا چیئرمین ، سینیٹر مشاہداللہ خان سیکرٹری اطلاعات و سینیٹر پرویز رشید سیکرٹری مالیات نا عہدہ غاتیا بیدس مقابلہ غان گچین
اسلام آباد۔ 18اکتوبر (اے پی پی) پاکستان مسلم لیگ(ن) نا مرکزی کونسل وزیراعظم محمد نواز شریف ئِ بیدس مقابلہ غان پارٹی نا صدر گچین کرینو۔ سے شنبے آ کنونشن سنٹر اسلام آباد اٹی پارٹی الیکشن نا انعقاد مس ہراٹی ملک انا ہرچار آ صوبہ، آزاد کشمیر ، گلگت بلتستان و بنجائی دارالحکومت آن تعلق تخوک آ 1950مرکزی کونسل نا باسک آک وزیراعظم محمد نواز شریف ئِ بیدس مقابلہ غان صدر گچین کریر۔ چیف الیکشن کمیشنر مسلم لیگ (ن) چوہدری جعفر اقبال گچین مروک آ پارٹی عہدیدار آتا پڑو ئِ کرے۔ اوپارے کہ محمد نواز شریف نا بطور صدر گچینی کن پارٹی نا کنڈآن 12کاغد جمع کرفنگا ہرا جانچ پڑتال نا وخت آ درست امنا کننگار واہم وزیراعظم محمد نواز شریف نا مقابلہ ٹی اسہ بندغ اس کاغد آتے جمع کرفے ہرا پارٹی آئین نا شق نمبر 120 نا رداٹ ہنداخاطران مسترد کننگا انتئے کہ او دا کونسل نا باسک ہی ہلوکہ۔ اوپاریر کہ ہنداوڑ ایلو مرکزی عہدیدار آتاکاغد آک ہم منظور مسر واہم اونا مقابلہ ٹی ہچ گہس کاغد آتے جمع کرفتو دا بناءآ اودے بیدس مقابلہ غان گچین کننگا۔ مسلم لیگ (ن) نا پوسکن گچین مروک آ صدر محمد نواز شریف پارٹی آئین نا رداٹ گچین مننگ آن گڈ پارٹی سیکرٹری جنرل و ڈپٹی سیکرٹری جنرل نا عہدہ غاتیا پندارباسک آتا پڑو ئِ گڈ اٹی کیک۔ راجہ محمد ظفر الحق پارٹی نا چیئرمین ، سینیٹر مشاہداللہ خان سیکرٹری اطلاعات و سینیٹر پرویز رشید سیکرٹری مالیات نا عہدہ غاتیا بیدس مقابلہ غان گچین مسر وخت اس کہ مسلم لیگ (ن) نا بیدس مقابلہ غان گچین مروک آ نائب صدر آتیٹی صوبہ خیبر پختونخوا آن سرتاج عزیز وسرانجام خان، بلوچستان آن چنگیز مری و سردار یعقوب خان ناصر، صوبہ سندھ آن امداد چانڈیو و آزاد کشمیر آن سردار سکندر حیات نا پن اوارے۔
