اسلام آباد۔ 18اکتوبر (اے پی پی) مسکوہی سفیر عارف کمال پارینے کہ مچ آ دنیا ٹی کشمیری الس نا توار بڑز مننگ ئِ۔ ریڈیوپاکستان تون ہیت وگپ کرسا اوپارے کہ مقبوضہ کشمیر اٹی بھارتی بیدادی نا انتہامسنے و کشمیریک ہم پبی وڑاٹ تحریک آجوئی ئِ مون آ دننگ ئُ ہرافتاتوار ئِ مچ آ دنیا ٹی خف توننگ انگ ئِ ۔ داوخت آ ہیت وگپ کرسا مسکوہی سیکرٹری او آئی سی خالد سلیم پارے کہ او آئی سی باسک ملک آتا ویل آتا ایسری کن اڈتننگاسس واہم اینو اسکان اونا کنڈآن منظور کروک آ اسہ قرارداد اسے آ ہم عملدرآمد مننگ کتنے، ہندا سوب ئِ کہ کشمیر نا ویل آ او آئی سی نا قرارداد آ بھارت نہ تو عمل کیک و نہ ہی اونا نمائندہ اسے کشمیر نا دورہ نا موکل ایتک۔ اوپارے کہ باسک ملک آتے مرے کہ او دا چرجوئی ٹی یکجا مرسا لائحہ عمل اس جوڑ کیر تانکہ او آئی سی نا قرارداد آتے عملی جامہ اس بیرفنگ مرے۔ اوپارے کہ پاکستان نا ساڑی آ حکومت نا کنڈان کشمیر نا ویل ئِ جوان وڑاٹ مچ آ دنیا ٹی تالان کننگ انگ ئِ ہرانا مثبت اثر آک ظاہر مننگ ئُ۔ اوپارے کہ داسا ضرورت دا ہیت انا ئِ کہ او آئی سی نا باسک ملک آک اواری اٹ بھارت آ پریشر شاغر تانکہ او او آئی سی نا نمائندہ غاتے کشمیر اٹی پترینگ انگ نا موکل ایتے و کشمیر نا ویل ئِ اقوام متحدہ نا قراردادآتا رداٹ ایسر کے۔ داوخت آ جہانی معاملہ غاتا چاہندار ڈاکٹر فاروق حسنات پارے کہ او آئی سی باقاعدگی اٹ کشمیر نا ویل ئِ چست کرسا کہ تو بھارت آ اسہ اخلاقی دباﺅ ودک ہرادے بھارت وخت اس ہم نظر انداز کننگ کپک و کشمیریک کشمیر ناویل ئِ ایسر کرفنگ اٹی سرسہب مریرہ۔
