عمران خان سیاسی تنیاہی نا گواچی ئِ و دُز درگہ آن وزیراعظم جوڑ مننگ نا تغ ئِ خننگ اٹی ئِ
کوئٹہ۔ 17اکتوبر (اے پی پی) سینیٹ نا قائمہ کمیٹی دیر و بجلی نا چیئرمین سینیٹر سردار محمد یعقوب خان ناصر پارینے کہ ڈیہہ نا ساڑی آ حالیت ، بھارتی جارحانہ عزم و جہد آجوئی کشمیر نا فیصلہ کن موڑآ مننگ نا وخت آ عمران خان نا اسلام آباد ئِ بند کننگ نا پڑو سمجھ آن پیشن ئِ ، بھارتی بیدادی و کشمیر نا ویل آپارلیمنٹ آن متفقہ قرارداد نا منظوری و آل پارٹیز کانفرنس اٹی غٹ سیاسی جماعت آتا کشمیر نا ویل آبنجائی حکومت نا موقف نا پبی مخ تفی آن مقبوضہ کشمیر نا تحریک آجوئی ئِ پوسکنو زند و کشمیری الس ئِ بھاز حوصلہ ملانے۔ داہیت ئِ او دوشنبے آ ”اے پی پی“ تون ہیت وگپ کرسا پارے۔ اوپارے کہ عمران خان نا اسلام آباد ئِ بند کننگ نا لندن پلان تھری نا ڈٹ ہم بے سہب مریک، تحریک انصاف بنجائی دارالحکومت ئِ بند کننگ و دھرنہ تننگ آن بیدس الیکشن کمیشن و عدالت نا فیصلہ غاتا انتظار ئِ کے۔ اسہ سوج اسے نا ورندی ٹی سینیٹر سردار یعقوب خان ناصر پارے کہ عمران خان سیاسی تنیاہی نا گواچی ئِ و دُزدرگہ آن وزیراعظم جوڑ مننگ نا تغ ئِ خننگ اٹی ئِ ولے اونا دا تغ وخت اس ہم پورو مننگ کپک وخت اس کہ اپوزیشن نا غٹ جماعت آک تحریک انصاف نا اسلام آباد برانز اٹی شرکت آن صاف انکار کرینو۔
