اسلام آباد۔ 17اکتوبر (اے پی پی) بنجائی وزیر اطلاعات ، نشریات و قومی میرات سینیٹر پرویز رشید پارینے کہ پاکستان ماحولیاتی تبدیلی نا منفی زئم آتون مون تننگ نا پورو عزم تخک۔ میڈیا ماحولیاتی تبدیلی و گلوبل وارمنگ نا خلیس آتیان بابت الس اٹی آگاہی کن شعور بیدار کے۔ دوشنبے آ داڑے ماحولیاتی تبدیلی آن بابت کانفرنس آن تران کرسا بنجائی وزیر اطلاعات پارے کہ وزیراعظم محمد نواز شریف 30نومبر 2015 ءآ پیرس کانفرنس آن تران کرسا ماحولیاتی تبدیلی نا بارواٹی پاکستان نا پالیسی ئِ بیان کریسس ہراٹی او پاریسس کہ پاکستان قابل استعداد متبادل ٹیکنالوجیز ، گچین توانائی کن گام گیج، ماس ٹرانسپورٹ سسٹم آ عملدرآمد، پن بجلی نا مون آ دننگ تون اوار گلوبل ایمیشنز اٹی کمتی و چندی پین گام گیج آتا تہیہ ئِ کرینے ہرا ننا شونداری سٹرٹیجی نا بشخ ئِ ۔ بنجائی وزیر گلوبل وارمنگ ئِ پاکستان نا معیشت و ماحولیات کن بھلو خلیس اس گوندسا پارے کہ اگرچہ گرین ہاﺅس گیسز آتا اخراج اٹی پاکستان نا بشخ کم ئِ واہم نن تینا معیشت و ماحولیات آ اونا سخت زئم آتا چٹفنگ کن گام گیج اختیار کننگ کینہ۔ اوپارے کہ ساڑی آ سال تیٹی پاکستان ئِ ماحولیاتی تبدیلی نا نسخان دہ زئم آتا مون تروئی تمانے۔ خشک سالی، صحرا بردی ، گلیشیئرز نا دیر مننگ، سطح سمندر اٹی ودکی و سیلاب آتا وار وار آ بننگ ماحولیاتی زئم آتا نتیجہ ئِ۔ داکان بیدس انسانی و مادی لاگت ہم پائیدار شون و معاشی شونہالی نا مون آ دننگ کن ننا لائخی تا حائل ئِ۔ اوپارے کہ ماحولیاتی تبدیلی نا سریس وخت اثرات حیاتیاتی تنوع، دیر انا دستیابی، فوڈ سیکورٹی، انسانی جان جوڑی و الس نا شونہالی کن نسخان دہ ئِ۔ اوپارے کہ پاکستان کشاری معیشت نا حامل ملک اسے ہرا بارانی و نیم بارانی ڈیہہ آ تالان ئِ، دانا کشت وکشار کن آبپاشی آ بھلو انحصار آ ہم ماحولیاتی تبدیلی آ بے کچ اثر انداز مننگ کیک۔ اوپارے کہ مسکوہی صدی نا وخت پاکستان 0.6ڈگری سینٹی گریڈ نا اوسط ودکی درجہ حرارت تون مون تس و ملک انا قطبی علاقہ غاتیٹی 0.8ڈگری سینٹی گریڈ درجہ حرارت اٹی ودکی بے کچ فریشانی نا ہیت اسے ہرا ننا معیشت کن منفی اثرات مرتب کیک۔ اوپارے کہ حکومت پاکستان ماحولیاتی تبدیلی نا منفی زئم آتون مون تننگ نا تہیہ کرینے۔ وژن 2025ء، ہرا پاکستان کن آخبت نا شونداری روڈ میپ ئِ۔ اوپارے کہ ننا قومی میعشت و شونداری ڈٹ بندی ٹی مربوط ماحولیاتی دوستانہ پالیسی تیٹی سال 2014-30ءکن نیشنل کلائیمیٹ چینج پالیسی و اونا فریم ورک اوارے۔ او میڈیا ہاﺅسز، صحافی و میڈیا نا منتظمین آتیا زورشاغا کہ اوالس اٹی ماحولیاتی تبدیلی و گلوبل وارمنگ نا بارواٹی شعور بیدار کیر۔ اوسیمینار نا اڈتننگ آ آرگنائزرز آتون اظہار تشکر کرے و پارے کہ اسہ اہم ئُ معاملہ اسے تالان کننگ کن مچ آ پاکستان آن بصیرت آمیز ترانکار آتے مدعو کننگا ہراڑآن ماحولیاتی تبدیلی تون مون تننگ کن گام گیج آتیا گچین عملدرآمد اٹی کمک رسینگک۔ داوخت آ ڈبلیو ای ایف نا چیئرمین سینیٹر نثار اے میمن ، آئی سی آئی ایم او ڈی نا نمائندہ ڈاکٹر فلپس ویسٹر و مسکوہی بنجائی وزیر اطلاعات و نشریات جاوید جبار ہم تران کریر۔
