مسلم لیگ (ن) نا پارٹی صدر نا گچین کاری کن وزیراعظم محمد نواز شریف نا پندار کاغد جمع
مسلم لیگ (ن) نا غٹ مرکزی عہدیدار آتا الیکشن (اینو) سے شنبے آ کنونشن سنٹر اسلام آباد اٹی مریک
اسلام آباد۔ 17اکتوبر (اے پی پی) مسلم لیگ (ن) نا پارٹی صدر نا گچین کاری کن وزیراعظم محمد نواز شریف نا پندار کاغد آتے جمع کرفنگا۔ مسلم لیگ (ن) نا غٹ مرکزی عہدیدار آتا الیکشن (اینو) سے شنبے آ کنونشن سنٹر اسلام آباد اٹی مریک۔ دوشنبے آ بنجائی وزیر اطلاعات و نشریات سینیٹر پرویز رشید و اوڑتون اوار بنجائی وزراءخواجہ سعد رفیق، انجینئر خرم دستگیر خان، وزیر مملکت ڈاکٹر طارق فضل چوہدری، انوشہ رحمان، باسک قومی اسمبلی ملک ابراراحمد، ڈاکٹر آصف کرمانی ، صدیق الفاروق، سینیٹر نہال ہاشمی، اسلام آباد نامیئر شیخ انصر عزیز، رفعت چوہدری، ذیشان چوہدری تون اوار ایلو پارٹی عہدیدارآک ہم ساڑی ئسر۔ پارٹی ڈل وزیراعظم محمدنواز شریف نا بطور پارٹی صدر گچین کاری کن پندارکاغد آتے پارٹی الیکشن کمشنر چوہدری جعفراقبال تون جمع کرفے۔ پندارکاغد آتے جمع کرفنگ آن گڈ بنجائی وزیر ریلوے خواجہ سعد رفیق احوالکار آتا نمائندہ غاتون ہیت وگپ کرسا پارے کہ 18اکتوبر آ مروک آ الیکشن اٹی پارٹی صدر، چیئرمین، 6سینئر نائب صدور، سیکرٹری اطلاعات و سیکرٹری مالیات نا 10عہدہ غاتیا گچین کاری کننگک۔ اوپارے کہ پارٹی آئین نا رداٹ مسلم لیگ (ن) نا صدر گچین مننگ آن گڈ پارٹی نا ایلو عہدہ غاتیا پنداری کننگ نا اختیار تخک۔ اسہ سوج اسے نا ورندی ٹی اوپارے کہ پارٹی گچین کاری نا عمل اسہ نن اٹی مننگ کپک انتئے کہ کونسل نا تشکیل ہر چار آصوبہ، آزاد کشمیر، گلگت بلتستان آ تالان 7زونز آتیان کننگک و دا عمل اٹی کیہی تو لگک۔ اسہ سوج اسے نا ورندی ٹی اوپارے کہ عمران خان جمہوری عمل اٹی خرابی و رخنہ شاغنگ خواہک ، اونا عزم ہچ گہس آن ڈھکوک اف ، ہراملک انا دارالحکومت ئِ بند کننگ خواہک او ملک انا خیر خواہ امر مننگ کیک۔ اسہ بندغ اس تینا است خواہی و تغ تا غلام جوڑ مسنے ، او وزیراعظم جوڑ مننگ نا تغ ئِ خننگ اٹی ئِ ، داڑآ پین انت تران کننگے۔ اسہ پین سوج اسے نا ورندی ٹی اوپارے کہ غٹ ریاستی ادارہ غاتون اواری اٹ حکومت جوڑ مریک۔ دا ملک اٹی ”بیدس پرہ“ آن بال کننگ نا فیشن جوڑ مسنے۔ اوپارے کہ عمران خان نا ہیت آتیٹی ہچئُ راستکی اس اف، ملک اٹی جمہوریت سوگو مننگ ئِ۔
