ضرورت مند کشارگر آتے کن باضابطہ مالیاتی ادارہ غاتا کمک اٹ قابل برداشت کریڈٹ لائن آ تالان مربوط دیہی شون نا ڈٹ اس پیش کننگے، نیزگار بزغر آتے کن مداخل نا کاریم اٹ اتنگ متحرک ادارہ جاتی کمکاری آن بیدس قابل عمل مننگ کپک
اسلام آباد۔ 17اکتوبر (اے پی پی) وزیراعظم محمد نواز شریف وزارت قومی غذائی رکھ وپٹ وپول ئِ پارت کرینے کہ ضرورت مند کشارگر آتے کن باضابطہ مالیاتی ادارہ غاتا کمک اٹ قابل برداشت کریڈٹ لائن نا مربوط دیہی شون نا ڈٹ اس پیش کننگے۔ ٹیکنالوجی ، موسمیاتی تبدیلی و آبی وسیلہ غاتا ویل آتا مونئِ تورسا بج آتا انحصار اٹی کمتی و بڑزکو قدر نا حامل مصنوعات آتیا توجوہ ئِ ودفنگ کن وزارت نا وسیع پالیسی فریم ورک و متنوع ڈٹ انا ستائِ کرسا او گڑاس ہندن ئُ بشخ آتا پیدواری ئِ کرے ہراڑے وزارت نا کنڈآن زیات توجوہ تننگ نا گرج ئِ تانکہ ملک اٹی کشت وکشار نا پیداواری بنداو ئِ وسعت تننگ مرے۔ وزیراعظم وزارت ئِ پارت کرے کہ دا معاملہ غا اسہ ہفتہ اسے ٹی جامع پریذنٹیشن اس تیار کننگے۔ اوپارے کہ ننا کشاری بشخ اٹی بھاز زیات افرادی واک اختہ عمل مریک ، جدت تخوک ٹیکنالوجی یا پوسکنا وڑوڈول اس اختیار کننگ آن براہ راست اخراجات و بے سہبی ناگڑتی مریک ، ہنداخاطران نیزگار بزغر آتے کن داوڑنا مداخل نا کاریم اٹ اتنگ متحرک ادارہ جاتی کمکاری آن بیدس قابل عمل مننگ کپک۔ کمرشل بینکس کشاری بشخ ئِ بے کٹیا کروک و رسک انا حامل سرپند کیک و داوڑ آڑھتی کڑز وغلہ غاتا لین و دین ئِ تین پہ تینی وڑاٹ منسلک کرسا دیہی کریڈٹ مارکیٹئِ محدود کاروباری مسابقت آن کنٹرول کیک ہراڑآن خالص کشاری کٹیا کم مریک۔ وزیراعظم کشاری پٹ و پول اٹی مواد نا گچینی نا گرج آ زور شاغا وپارے کہ وزارت ئِ پٹ وپولی ادارہ غاتا مجوزہ تنظیم نو کن ٹھوس و قابل تصدیق احتساب نا میکنزم اس تجویز کروئی ئسک تانکہ اسپیشل پے سکیلز آتا خواست ئِ جوازملنگ کے۔ اوپارے کہ ہندی موسمیاتی حالیت آتے کن موزوں بڑزکو پیداوار و ضرررساں جوجک آتا برخلاف مدافعت نا حامل بج آتا تیاری و دستیابی نا کمک اٹ پیداوار ئِ ودفنگ کن نجی بشخ انا سیڈ کارپوریشنز و مارکیٹنگ کمپنی تا است بڈی نا گرج ئِ۔ او نجی بشخ انا فرم آتے کن بج آتا پوسکنا قسم آتا مارکیٹنگ ئِ آسان جوڑ کننگ آ ہم زورشاغا۔ اوپارے کہ صوبائی ایگریکلچر ایکسٹینشن سروسز ونگز بزغر آتے مطلوبہ خذمت فراوان کننگ اٹی بے سہب مسنے۔ ہنداخاطران وزارت ئِ او خذمت آتا فراوانی کن پبلک پرائیویٹ پارٹنر شپ انا طرز آ اونا متبادل ئِ پیش کروئی مرے۔ وزیراعظم حیاتیاتی لائخی آن پبی استفادہ کننگ، مارکیٹنگ نا ویل آتے ایسر کننگ، ڈبلیو ٹی او نا گرج آتارداٹ فصل آتا پیداوار ئِ ودفنگ کن گام گیج آتا گرج آ زورشاغا۔ اوپارے کہ کشت وکشار نا بشخ اٹی انفارمیشن ٹیکنالوجی نا کاریم اٹ اتنگ کن فارمرز کمیشن اینڈ ایگریکلچر ٹیکنالوجی پارک انا اڈتننگ نا قابل عمل مننگ نا جاچ ئِ ہلنگ آ زورشاغا۔ وزیراعظم پارے کہ ایکشن پلان اٹی اعلیٰ قدر نا حامل کیہی فصل آتا کیہی علاقہ غاتیٹی خاص کر زیتون و انگور آتے کن پوٹھوہار، دال آتے کن قلات و خضدار، اِلار تے کن کرک مکران،سوف آتے کن کوئٹہ و ژوب ڈویژنز وخت اس کہ خولم کن ڈیرہ اسماعیل خان ڈویژن اٹی پیداواری لائخی ئِ ہم تالان کروئی مرے ۔
