دابابت آن صلابت کرسا ایوان ئِ معلومدار کینہ، بنجائی وزیر زاہد حامد
پارلیمنٹ نا اسیجائی دیوان ئِ بٹنگے تو نن سشما سوراج نا بیان آ صاف شرہ کننگ کینہ، قائد حزب اختلاف سید خورشید شاہ
اسلام آباد۔ 27ستمبر (اے پی پی) اسپیکر قومی اسمبلی سردار ایاز صادق بھارتی وزیر خارجہ نا بیان آ پارلیمنٹ نا اسیجائی دیوان ئِ خوائفنگ نا قائد حزب اختلاف نا سلاہ غا حکومت آن رائے خواہسونے۔ قائد حزب اختلاف اعتراضی ٹک آ دابیان آ دیوان ئِ بٹنگ انگ نا خواست کرے ہراڑآ اسپیکر وزیر کانود زاہد حامد تون پارے کہ او اسیجائی دیوان نا بابت اپوزیشن ئِ پت اٹی ہلے و قائد حزب اختلاف نا خواست ئِ حکومت اسکان سرکے۔ زاہد حامد پارے کہ او دا بابت صلابت کرسا ایوان ئِ معلومدار کیک۔ ڈاکٹر شیریں مزاری پارے کہ فاٹا نا معاملہ غا ایڈوائزری کمیٹی ٹی فیصلہ مسوسس۔ بھارتی وزیر خارجہ ایٹمی دھڑکو تسنے۔ دامعاملہ غا زوت آن زوت شرہ بایدے مرے۔ محمود خان اچکزئی پارے کہ کشمیر اسہ اہم ئُ ویل اسے، ننا تہہ نا حالیت آک ہم اسیجائی دیوان اٹی بایدے شرہ ٹی اتنگر۔ اسیجائی دیوان ئِ صرف کشمیر اسکان محدود تخوئی مف ۔ قائد حزب اختلاف پارے کہ کشمیر نا ویل اتون اوار اوار بلوچستان تون اوار ایلو معاملہ غاتے ہم شرہ ٹی اتنگ مریک۔ شیر اکبر خان پارے کہ مچ آ قوم و سیاسی سروک آک کشمیر نا معاملہ غا متفق ئُ۔ اسیجائی دیوان ئِ جمعہ غا بٹنگ انگے۔ وسیم حسین پارے کہ بھارت دھڑکو تننگ ئِ۔ زوت آن زوت دا ویل ئِ شرہ ٹی اتنگے۔ اسپیکر پارت کرے کہ حکومت و اپوزیشن اواری اٹ صلابت تون اسیجائی دیوان نا تاریخ و ایجنڈہ اس طے کیر۔ داکان مست قائد حزب اختلاف سید خورشید احمد شاہ پارے کہ کشمیر نا ویل بھاز اہمیت اختیار کرسا ہِننگ ئِ ، بھارت کیہی وڑوڈول اٹ پاکستان آ زور شاغنگئِ ۔ بھارتی وزیر خارجہ تدوک آ دے اسہ بیان اس تسنے ، دابابت اسیجائی دیوان اس بٹنگ انگے تو نن صاف شرہ کننگ کینہ۔ قومی اسمبلی نا دیوان اٹی اعتراضی ٹک آ سید خورشید احمد شاہ پارے کہ کشمیر نا معاملہ بھاز اہمیت کرسا ہِننگ ئِ ۔ دا پاکستان و ننا بقاءنا ویل ئِ۔
