اسلام آباد۔ 20 ستمبر (اے پی پی) سی پیک ڈٹ دنیا ٹی جاری غٹ آن بھلا شونداری ڈٹ ئِ، 46ارب ڈالر مالیت نا پاک چین اقتصادی راہداری ڈٹ پاکستان ئِ ترند رفتار اقتصادی شون نا کسر آ دیک، سریس، کشادہ و رکھوک سڑک، توانائی نا ڈٹ، انڈسٹریل پارکس و گوادر بندرگاہ نا ڈٹ، ہرانا پوروی دہشت گردی نا برخلاف جنگ آن زہمی پاکستان کن روشن آخبت نا روشنائی ئِ۔ کمامدارآک اے پی پی ئِ پاریر کہ اینخو سال نا ایسر اسکان پاک چین اقتصادی راہداری آن ملک انا غٹ صوبہ غاتے اسہ وڑ فائدہ ملنگ نا بناءمریک، سی پیک نا چنکو وختی ڈٹ 2017، و 2018ءوخت اس کہ سریس وختی ڈٹ 2020ءآن 2030 ءاسکان پورو مریک۔ اوپارے کہ تکمیلی مرحلہ نا وخت آ ہی سڑک و بجلی نا ڈٹ آتا فائدہ الس ئِ ملک،کراچی نا بن قاسم پاور پلانٹ بروک آ سال انا ایسر اسکان بجلی نا پیداوار نا بنائِ کیک، کولاآن چلینگوک آ 660 میگاواٹ نا 2پاور پلانٹس آتا جوڑ جاڑ آن دوئی مروک آ1320 میگاواٹ بجلی نظام اٹی بننگ و شارٹ فال اسہ تہائی اس کم مریک۔ اوپارے کہ قراقرم ہائی وے ئِ گچین جوڑ کننگ تون ایم فور نیشنل موٹروے آ ہم چینی انجینئر ز دے و نن کاریم اٹ اختہ ئُ، ریل ویز و لائٹ ریلز انا اپ گریڈیشن ہم ہندا ڈٹ انا بشخ ئِ ۔ اوپارے کہ ڈٹ انا محور وگوادر ، ہراڑے سی پیک ڈٹ بحیرہ ہند اتون ملک، ہنداکان غٹ وسیلہ غاک پاکستان نا بنجاو دیکی چین آ کارہ، وخت اس کہ پاکستان و چین اٹی تیار مروک آ مال مچ آ دنیا ٹی گدریفنگرہ۔ گوادراٹی فری ٹریڈ زون ، اسپیشل اکنامک زون، کوسٹل ہائی وے ہم پوروی نا مرحلہ غاتیٹی ئِ ، گوادر انٹرنیشنل بالی پٹ آ ہم ہندا سال کاریم نا بناءمریک۔
