ہڑتوم آ کسرشون آتا پاکستان و سعودی عرب نا نیام اٹ گچین ہڑتوم آ کنڈآتا تعلقداری آ است جمی نا درشان
نیویارک۔ 20 ستمبر (اے پی پی) وزیراعظم محمد نواز شریف تون سعودی ولی عہد و سعودی عرب نا نائب وزیراعظم شہزادہ محمد بن نائف عبدالعزیز نیو یارک اٹی اوڑدہی کرے، اوڑدہی ٹی وزیراعظم نا سلاہکار خارجہ امور سرتاج عزیز و سیکرٹری خارجہ اعزاز احمد چوہدری ہم ساڑی ئسر۔ اوڑدہی نا وخت آ ہڑتوم آ کسرشونک پاکستان و سعودی عرب نا نیام اٹ گچین ہڑتوم آ کنڈآتا تعلقداری آ است جمی نا درشانی ئِ کرے وخت اس کہ ہڑتوم آ ملک آک امت مسلمہ نا اِرا اہم تمبہ ہم اریر ۔ وزیراعظم محمد نواز شریف سعودی عرب نا سلامتی و علاقائی سالمیت نا برخلاف ہروڑنا خلیس آن رکھ اکن کمکاری نا عزم انا اعادہ ئِ کریر۔ وزیراعظم اوڑدہی نا وخت آ مقبوضہ جموں و کشمیر اٹی بھارتی بیدادی نا بارواٹی معلومدار کرسا پارے کہ بھارتی مقبوضہ فورسز آک جموں و کشمیر نا مچ آ ریاست ئِ جیل جوڑ کرینو۔ وزیراعظم محمد نواز شریف بھارتی حکومت نا ساڑی آ دھڑکو آمیز بیان آتا حوالہ ئِ ترسا پارے کہ داوڑنا بیان آتیان مچ آ ڈیہہ نا امن و سوگوی خلیس اٹ تمک۔ وزیراعظم محمد نواز شریف دا ہیت آ زورشاغا کہ بین الاقوامی برادری ئِ ویل انا شدت نا احساس ئِ کروئی مرے و داسیاسی ویل ئِ اقوام متحدہ نا سلامتی کونسل نا قرارداد آتا رداٹ کشمیری الس نا است خواہی نا رداٹ مذاکرات نا کمک اٹ ایسر کروئی مرے، ہنداوڑ کشمیری الس ئِ تینا مزل نا تینٹ فیصلہ ئِ کروئی ئِ۔ وزیراعظم محمد نواز شریف او آئی سی و ایلو اسلامی ملک آتیا زورشاغاکہ او وادی کشمیرنا تینا مسلمان ایڑ ایلم تے کن توار بڑز کیر ہرافتا انسانی حق بھارتی سیکورٹی فورسز ووحشیانہ طاقت نا کاریم اٹ اتنگ آن پامال کننگ ئِ۔ وزیراعظم محمد نواز شریف سعودی ولی عہد ئِ دہشت گردی نا برخلاف پاکستان نا آپریشن ضرب عضب نا سرسہبی اتون اوار اوار ملک آن شدت پسندی نا چٹفنگ نا قومی ایکشن پلان آ پیش رفت نا بارواٹی ہم پارے۔ ہڑتوم آ کسرشونک داعزم انا اعادہ ئِ کریر کہ مچ آ مسلم امہ ئِ شدت پسندی نا داخلیس آن بچفنگ کن اجتماعی وڑاٹ کوشست کننگ نا گرج ئِ۔ ہڑتوم آ کنڈآک علاقائی حالیت خاص کر اوغانستان اٹی امن کوشست آتون اوار اوار شام ، عراق ، یمن نا حالیت آتا بارواٹی ہم درشانِ خیال کریر۔ وزیراعظم محمد نواز شریف مسلم دنیا ٹی ہم آہنگی و اتحاد ودی کننگ نا گرج ئِ تالان کرے۔ اوڑدہی نا وخت توانائی نا بشخ اٹی کمکاری، اقتصادی تعلقداری و سعودی عرب اٹی پاکستانی کمیونٹی نا کڑد کون آ معاملہ غاتیا ہم درشانِ خیال کننگا۔
