سیکرٹری خارجہ اعزاز احمد چوہدری نا پاکستانی صحافی تے بریفنگ
وزیراعظم نا ساڑی آ دورہ ”مشن کشمیر“ ئِ، کشمیر نا ویل انا بارواٹی تینا قرارداد آتیا عملدرآمد سلامتی کونسل نا زمہ واری ئِ ، ڈاکٹر ملیحہ لودھی
اقوام متحدہ۔ 20 ستمبر (اے پی پی) وزیراعظم محمد نواز شریف مچ آ دنیا آن بروک آ اہم کسرشون آتون اوڑدہی کرے و اوفتے بھارت نا زیر تسلط مقبوضہ کشمیر نا الس نا مشکلات و آجوئی کن اوفتا جہد آن معلومدار کرے۔ سیکرٹری خارجہ اعزاز احمد چوہدری پاکستانی صحافی تے دابابت آن پارے کہ وزیراعظم محمد نواز شریف امریکی وزیر خارجہ جان کیری ‘ برطانوی وزیراعظم تھریسامے‘ سعودی ولی عہد و نائب وزیراعظم محمد بن نائف بن عبدالعزیز السعود و نیوزی لینڈ نا وزیراعظم جان کی تون اقوام متحدہ نا جنرل اسمبلی نا 71می دیوان نا اڈتننگ نا وخت آ اوڑدہی کرے و کشمیر نا الس نا است خواہی و خواہش آتا ترجمانی ئِ کرسا اوفتے کشمیری الس نا جہد نا بارواٹی پارے۔ سیکرٹری خارجہ وزیراعظم نا اوڑدہی تے جوڑجاڑی گوندسا پارے کہ وزیراعظم کشمیر نا تنازعہ ئِ پرامن وڑاٹ ایسر کننگ نا دمدستی گرج انا کلہو ئِ تس و بین الاقوامی برادری آ زورشاغا۔ صحافی تا سوج آتا ورندی ئِ ترسا سیکرٹری خارجہ پارے کہ جہانی کسرشون آتون اوڑدہی تیٹی وزیراعظم کشمیر نا ویل آ تینا کل توجوہ ئِ تخا و جہانی برادری آ زورشاغاکہ کشمیری الس تون انصاف کیر و اقوام متحدہ نا چارٹر نا رداٹ کشمیری الس نا حق خودارادیت نا دوئی ٹی اوفتا کمک ئِ کیر۔ وزیراعظم مقبوضہ کشمیر اٹی انسانی حق انا خلاف ورزی تا چٹفنگ آہم زورشاغا۔ اوپارے کہ وزیراعظم اینو(چارشنبے آ) اقوام متحدہ نا جنرل اسمبلی آن تینا تران اٹی ہم کشمیر نا ویل ئِ تالان کیک۔ اقوام متحدہ ٹی پاکستان نا مندوب ملیحہ لودھی ہراسیکرٹری خارجہ تون اوار ئس ، وزیراعظم نا ساڑی آ دورہ ئِ ”مشن کشمیر“ نا پن تس۔ اوپارے کہ اقوام متحدہ نا سلامتی کونسل نا ایجنڈہ آ کشمیر نا ویل ساڑی ئِ و سلامتی کونسل نا 15باسکی ادارہ نا دا زمہ واری ئِ کہ او کشمیر نا ویل آ تینا قرارداد آتیا عملدرآمد کرفے۔ اوپارے کہ وزیراعظم اقوام متحدہ نا سیکرٹری جنرل و سلامتی کونسل نا صدر ئِ دا بابت آن ہم چھٹی اس ہم لکھانے۔ داکان بیدس سلامتی کونسل نا برطانیہ ، چین ، فرانس ، روس و امریکہ تون اوار پنچ آخبتی باسک ملک آتا کسرشون آتے ہم وزیراعظم چھٹی اس گدریفینے ہراٹی اوفتے آن جموں و کشمیر نا تنازعہ نا بابت نیام تمنگ نا خواست کننگانے۔ مقبوضہ کشمیر اٹی تدینگوک آ 74دے انا وخت جاری برانز و کرفیو نا وخت 100 آن زیات بندغ بھارتی فورسز آتا دوتے اٹ شہید وخت اس کہ ہزار آک ٹھپی مسنو وخت اس کہ پیلٹ گن اٹ اندھادھند سم کاری نا نتیجہ ٹی ورنا تا بھلو کچ اس تینا بینائی آن محروم مسنو۔ مقبوضہ جموں و کشمیر نا اڑی سیکٹر اٹی ساڑی آ واقعہ آن بابت سوج آ سیکرٹری خارجہ پارے کہ بھارت ئِ تنازعہ کشمیر نا ایسری کن سنجیدگی اٹ غور کروئی مرے و پاکستان نابرخلاف بے بنداو دوبہ خلنگ آن بیدس مذاکرات نا کسر آ پدی بروئی مرے۔ اوپارے کہ بھارت مقبوضہ کشمیر اٹی انسانی حق انا خلاف ورزی تیان دنیا نا توجوہ ئِ اسہ پلو کننگ نا کوشست ئِ کننگ ئِ۔ اوپارے کہ بھارت اڑی نا واقعہ نا مناسب جاست و پاست آن مست ہی پاکستان آ بے بنداو دوبہ خلنگ نا بنائِ کرے۔ بھارت ئِ سرپند مروئی مرے کہ مقبوضہ کشمیر نا حالیت پاکستان نا جوڑ کروک اُس اف بلکن دا بھارت نا غیر کانودی و غاصبانہ کوزہ و بھارتی بیدادی نا اسہ سریس تاریخ نا براہ راست نتیجہ ئِ۔ وزیراعظم محمد نواز شریف امریکہ و برطانیہ غا زورشاغاکہ بھارت ئِ مقبوضہ کشمیر اٹی طاقت نا بہیمانہ کاریم اٹ اتنگ آن توننگے و کشمیر نا ویل انا ایسری کن کمک کرینے۔ سیکرٹری خارجہ پارے کہ سعودی نائب وزیراعظم تون اوڑدہی ٹی وزیراعظم تین پہ تینی است خواہی نا ہڑتوم آ کنڈآتا و علاقائی ویل آتیا درشانِ خیال کرے۔ اوپارے کہ ہڑتوم آ ملک آک دہشت گردی و انتہاءپسندی تون مون تننگ کن اواری اٹ کاریم کننگ آ اتفاق کریر۔ اواسہ ہندن ئُ وخت اسے ٹی وخت اس کہ مسلمان تے مچ آ دنیا ٹی جتا چیلنج آک مون تروک ئُ ، اواری اٹ کاریم کننگ و مسلم امہ ٹی اتحاد و یکجہتی ودی کننگ کن تینا عزم انا درشانی ئِ کریر۔ وزیراعظم چارشنبے آ اقوام متحدہ نا اسمبلی نا جنرل ڈیبیٹ نا افتتاحی دیوان اٹی شرکت کیک۔ داڑآن بیدس او سیکرٹری جنرل بان کی مون نا کنڈآن سروک آتا اعزاز اٹی تروک آ رسمی دے انا اِرغ اٹی ہم شرکت کیک۔ اوکان گڈ او جاپان نا وزیراعظم و ترکی ناصدر رجب طیب اردوان تون ہم اوڑدہی کیک۔ او امریکی صدر نا کنڈآن پناہ گزین آتیان بابت کسرشون آتا کانفرنس اٹی براک اوباما تون ہم اوڑدہی کیک۔
