فرانس پاکستان تون واپاری تعلقداری تے سوگو جوڑ کننگ و زرکاری کننگ نا خواہندار ئِ
ساڑی آ ہڑتوم آکنڈآتا واپار اٹی نمان ودکی و پوریاگرتا آسراتی کن گام گیج آتیا اتفاق
پیرس۔ 16ستمبر (اے پی پی) فرانس نا وزیر خزانہ مائیکل سیپن پاکستان نا کنڈآن مسکوہی مسہ سال اٹی شون و شان معاشی سرسہبی تا ستائِ کرسا پارینے کہ اونا ملک پاکستان تون واپاری و معاشی تعلقداری تے سوگو جوڑ کننگ و زرکاری نا سازگار چاگڑد آن فائدہ ہرفنگ نا خواہندار ئِ۔ داخیال آتا درشانی ئِ او وزیر خزانہ سینیٹر محمد اسحاق ڈار تون پیرس اٹی اسہ اوڑدہی اسے نا وخت آ کرے۔ اوپارے کہ پاکستان مسکوہی مسہ سال اٹی شون و شان معاشی سرسہبی دوئی کرے ہرافتے ٹی میکرواقتصادی سوگوی، مالیاتی ڈسپلن ، مربوط شرح نمو و اسٹاک مارکیٹ نا ریکارڈ کارکڑد اوارے۔ پاکستان ساڑی آ اصلاحات آتا تسلسل تون بروک آ سال آتیٹی زیات شرح نمو ئِ برقرار تخنگ کیک۔ دہشت گردی نا برخلاف جنگ اٹی سرسہبیک ہم ستاکڑزرہ۔ فرانسیسی وزیر خزانہ پاکستان نا معاشی شون آ وزیر خزانہ سینیٹر اسحاق ڈار ئِ مبارکبادی ہم تس۔ داوخت آ بنجائی وزیر خزانہ سینیٹر اسحاق ڈار فرانسیسی وزیر خزانہ ئِ معاشی سوگوی کن ساڑی آ حکومت نا کنڈآن کروک آ چندی جیرت مندانہ ڈھانچہ جاتی معاشی و مالیاتی اصلاحات آتیان معلومدار کرے و پارے کہ دنیا نا پنی مالیاتی ادارہ و اقتصادی چاہندارآک پاکستان اٹی معاشی سوگوی نا صفت ئِ کرینے، ہرا پاکستان ئِ بروک آ عشرہ غاتیٹی دنیا نا گچین 20 معاشی وڑاٹ سوگوملک آتیٹی شمار کننگ ئُ۔ اوپارے کہ پاکستان و فرانس ئِ تینا الس نا تین پہ تینی مفاد کن معاشی و واپاری تعلقداری تیٹی ودیکی کروئی مرے۔ ہڑتوم آ وزیر آک ساڑی آ ہڑتوم آ کنڈآتا واپار اٹی نمان ودکی و پوریاگر تا آسراتی کن گام گیج آتیا اتفاق کریر۔ اواسیجائی اقتصادی کمیشن نا دروشم اٹی انتظامی، معاشی و واپاری کمیٹی ئِ وزارتی کہول آ اپ گریڈ کننگ نا ہم جاچ ئِ ہلک و معیشت ، کشت و کشار ، فوڈ پراسیسنگ ، ایوی ایشن، انفارمیشن ٹیکنالوجی ، آٹو موبائلز و انجینئرنگ تون اوار کیہی بشخ آتیٹی کمکاری ئِ مون آ دننگ نا وڑوڈول آتیاہم خیال آتا درشانی ئِ کریر۔
