اسلام آباد۔ 01ستمبر (اے پی پی) پاکستان اسہ وار ولدا صفاکرینے کہ بھارت بھارت ہراتم خوائے پاکستان مذاکرات کن تیار ئِ واہم مذاکرات کن شرط آتے تسلیم کپنہ، پاکستان کشمیر نا ویل ئِ ہر جہانی کہو ل آ چست کرسا کیک۔ امریکہ بھارت دفاعی معاہدہ اِرا وت واجہ ملک آتا ذاتی معاملہ ئِ ولے داڑآن سویلی ایشیانا سٹریٹجک توازن بایدے زہمی مف، وزیراعظم محمد نواز شریف اقوام متحدہ نا سیکرٹری جنرل ئِ ورندی چھٹی ٹی بھارتی فورسز آتا کنڈآن انسانی حق انا خلاف ورزی تا جاست وپاست کن فیکٹ فائنڈنگ مشن مقبوضہ کشمیر آ گدریفنگ نا خواست کرینے، اوغان کمامدارآتا کنڈآن بشخنداری آن گڈ چمن بارڈر ئِ دوارہ ملفنگا، پاکستان دہشت گرد رڑآتا برخلاف بے پرخ کارروائی کننگ ئِ، سعودی عرب اٹی پاکستانی ورکرز آتا دزگیری آن بابت احوال آک سراسر دروغ آمبنی ئُ۔ پنچ شنبے آ داڑے ہفتہ وار پریس بریفنگ نا وخت آ سوج آتا ورندی ئِ ترسا دفترخارجہ نا ترجمان نفیس زکریا کشمیر آن بابت اسہ سوج اسے آ پارے کہ بھارت ہراتم کہ خوائے پاکستان غیر مشروط مذاکرات کن تیار ئِ ، واہم کشمیر نا ایجنڈہ سرفہرست مریک۔ ترجمان پارے کہ وزیراعظم محمد نوازشریف اقوام متحدہ نا سیکرٹری جنرل بان کی مون نا چھٹی نا ورندی ئِ ترسا چارشنبے آ اودے ورندی چھٹی اس نوشتہ کرینے ہراٹی اقوام متحدہ نا سیکرٹری جنرل ئِ مقبوضہ کشمیر اٹی ترندی اٹ بگڑینگوک آحالیت و بھارتی فورسز آتا ظلم آن معلومدار کرسا فیکٹ فائنڈنگ مشن ئِ گدریفنگ نا خواست کننگانے۔ وزیراعظم تینا چھٹی ٹی پارینے کہ آزاد جموں کشمیر نا مقبوضہ کشمیر نا حالیت آن موازنہ ہچ ئُ دروشم اسے ٹی کننگ مفک ہراڑے بھارتی فورسز آک مسکوہی کیہی دہائی تیان بے گناہ کشمیری تیا ظلم کننگ ئُ۔ چھٹی ٹی بھارتی وزیراعظم نا کنڈآن بلوچستان آن بابت بیان ئِ اقوام متحدہ نا چارٹر نا پورو خلاف ورزی گوندسا پاننگانے کہ بھارتی وزیراعظم نا بیان مقبوضہ کشمیر اٹی بھارتی ظلم آن جہانی برادری نا توجوہ ئِ مرکننگ نا بے سہب کوشست ئِ۔ بھارت، اوغانستان و امریکہ آ تالان سہ کڑدہی رڑانا تشکیل نا بابت آن ترجمان پارے کہ ننے دا پلیٹ فارم تشکیل کننگ نا مقصد نا علم اف، ولے ہراتسکان اوغانستان اٹی امن نا تعلق ئِ، پاکستان اوغانستان اٹی قیام نا غرض آن کوشست آتے کن پرعزم ئِ، نن سمجھنہ کہ اوغانستان اٹی امن پاکستان و ڈیہہ نا مفادا ٹی ئِ، ساڑی آ امریکہ بھارت دفاعی معاہدہ آن بابت اسہ سوج اسے نا ورندی ئِ ترسا ترجمان پارے کہ دا اِرا وت واجہ ملک آتا اسہ ایلو نا معاملہ ئِ ولے داڑآن سویلی ایشیاٹی سٹریٹجک توازن بایدے زہمی مف۔ چمن بارڈر نا بابت آن اسہ سوج اسے نا ورندی ئِ ترسا ترجمان پارے کہ پاکستان و اوغانستان ہر تو باقاعدگی آن فلیگ میٹنگز آ اتفاق کرینے ۔ ہڑتوم آ ملک آخ اسہ ایلو نا قومی بیرک، کسرشون و دستاویزات آتا شرف کننگ آ اتفاق کرینو۔ سعودی عرب اٹی پھسائنگوک پاکستانی تیان بابت اسہ سوج اسے نا ورندی ئِ ترسا او بیدس ویزہ نا پاکستانی ورکرز آتا دزگیری آن بابت احوال آتے مسترد کرے و پارے کہ سعودی کمامدارآک دا چرجوئی ٹی ہر وڑکمک و امداد فراوان کننگ نا یخین دہانی کرفینو۔
