گوادر پاکستان و پاکستان گوادر ئِ ، پاکستان اٹی دہشت گردی سکرات آٹی ئِ ، بلوچستان امن نا جاگہ اس جوڑ مرسا کننگ ئِ ، او دے مر اف ہراتم چین آن ٹریفک چلینگک و گوادر آ بریک، چین نا کمک اٹ توانائی ، ریلوے نا گچینی، اقتصادی زونز آتا اڈتننگ، روڈ نیٹ ورک تون اوار انفراسٹرکچر نا چندی ڈٹ آتے پورو کننگ انگ ئِ ، چین و پاکستان نا نیام اٹ سنگتی سیاسی کہول آن داسا اقتصادی کہول اٹی بدل مننگ ئُ، 2018 ءاسکان ملک آن لوڈشیڈنگ نا خاتمہ مریک
گوادر۔ 01ستمبر (اے پی پی) وزیراعظم محمدنواز شریف پارینے کہ ساڑی آ حکومت نا کنڈآن شون نا عمل ئِ رتسلسل اتون مون آ دننگ آن مسکوہی نا پسماندہ انگا شار گوادر آخبت نا شون ہلوک انگا شار مریک، گوادر پاکستان و پاکستان گوادر ئِ، 1991ءٹی ہی گوادر نا اہمیت نا اندازہ مسوسس دا کنا بھلو وخت اسے نا تغ اس ہرا الحمداللہ اینو پورو مرسا نظر بننگ ئِ، پاکستان اٹی دہشت گردی سکرات آٹی ئِ ، بلوچستان امن نا جاگہ اس جوڑ مرسا کننگ ئِ ، او دے مر اف ہراتم چین آن ٹریفک چلینگک و گوادر آ بریک ، گوادر بندرگاہ پاکستان و چین ہڑتوم آتے کن اسہ وڑ مفید مریک ، توانائی ، ریلوے نا گچینی، اقتصادی زونز آتا اڈتننگ، روڈنیٹ ورک آتون اوار انفراسٹرکچر نا چندی ڈٹ آک چین نا کمک اٹ پورو کننگ انگ ئُ، چین و پاکستان نا نیام اٹ سنگتی سیاسی کہول آن داسا اقتصادی کہول اٹی بدل مننگ ئِ ہندا پائیدار سنگتی نا نشانی ئِ، ملک اٹی پن بجلی ، کولا، ایل این جی، ونڈ، سولر پاور پلانٹس آ کاریم جاری ئِ، 2018 ءاسکان پاکستان آن لوڈشیڈنگ نا خاتمہ مریک۔ او داخیال آتا درشانی ئِ پنچ شنبے آ داڑے چندی شونداری ڈٹ آتا افتتاح و بنداو ئِ تخنگ نا دود آن تران کرسا کرے۔ وزیراعظم شادی کورڈیم، گوادر فری زون ، بزنس کمپلیس تون اوار چندی شونداری ڈٹ آتا افتتاح ئِ کرے ہرافتامقصدملک انا مر مر انگا علاقہ غاتے بنجائی دنگ اٹی اتنگ و شون و شونہالی نا بھرم آتیان مستفید کروئی ئِ۔ گورنر بلوچستان محمد خان اچکزئی ، وزیراعلیٰ بلوچستان نواب ثناءاللہ زہری، بنجائی وزیر ڈٹ بندی و شون احسن اقبال، بنجائی وزیر پورٹ و شپنگ میر حاصل بزنجو و قومی سلامتی نا سلاہکار لیفٹیننٹ جنرل (ر) ناصر جنجوعہ ہم وزیراعظم تون اوار ئسر۔ دود اٹی پاکستان اٹی چین نا سفیر سن وائی ڈونگ ہم ساڑی ئس۔ داوخت آ وزیراعظم ئِ کیہی ڈٹ آتا بارواٹی بریفنگ تننگا۔ وزیراعظم گوادر اٹی 23سد ایکڑ آ تالان گوادر فری زون نا بنداو ئِ تخا او4لکھ ڈالر نا خڑچ آن فقیر آباد، گوادر اٹی چین پاکستان پرائمری اسکول نا بنداو ئِ ہم تخا دا ڈٹ کمیونسٹ پارٹی چین نا کنڈآن ٹیکی اسے۔ وزیراعظم گوادر بزنس سروس کمپلیکس نا ہم بنداو ئِ تخا ہراڑے کمپنی ، درآمد، برآمد کنندگان آتا دفتر آک مریرہ۔ دا ڈٹ آ 2ارب روپئی خڑچ بریک۔ وزیراعظم گوادر اٹی شادی کورڈیم نا افتتاح ئِ ہم کرے ہراڑآن پسنی و ایلو علاقہ غاتا رہینگوک آتے آبپاشی کن دیر دوئی مریک۔ وزیراعظم ساور کورڈیم نا ہم افتتاح ئِ کرے ، دا ڈیم آ جون 2011ءٹی کاریم نا بناءمسوسس اوٹی 45ہزار ایکڑ فٹ دیر کوڑی کننگ نا گنجائش مریک۔ وزیراعظم یونیورسٹی آف گوادر نا بنداو ئِ ہم تخا ہرا ملک انا مرمر انگا علاقہ غاتے ٹی خلقت آتے آب اٹو تعلیم فراوان کیک و قومی شون نا عمل ئِ مون آ دننگ اٹی کمک رسینگک۔ دود آن تران کرسا وزیراعظم محمد نواز شریف پارے کہ گوادر اٹی بجلی و صاف دیر انا ڈٹ آتیا کاریم جاری ئِ ، ڈٹ آتیان نہ صرف گوادر بلکن بلوچستان نا ایلو علاقہ غاتے ہم دیر و بجلی میسر مریک، گوادر اٹی جہانی کہول انا ایئر پورٹ اس جوڑ مننگ ئِ، گوادر پاکستان نا غٹ آن اہم انگا شار جوڑ مننگ ئِ۔ وزیراعظم پارے کہ چین نہ صرف پاکستان نا سنگت بلکن گوادر ڈٹ اٹی شریدار ہم ارے۔ گوادر بندرگاہ پاکستان و چین ہڑتوم آ تے کن اسہ وڑفائدہ مند ئِ۔ اوپارے کہ 2018ءنا اول اٹی 10 ہزار میگاواٹ بجلی نا پیداوار شروع مریک، بجلی نا ڈٹ آتیا کاریم ترندی اٹ جاری ئِ، 2018ءاسکان پاکستان آن لوڈشیڈنگ نا خاتمہ و بجلی نا گرج آتے پورو کیک۔ اقتصادی راہداری نا کمک اٹ پاکستان نیامی ایشیاتون منسلک مریک۔ اوپارے کہ گوادر اٹی 300 میگاواٹ نا بجلی اُرا جوڑمریک ، ڈی سینٹیشن پلانٹ آن گوادر نا ہنکینی تے کنوئی آ صاف دیر ملک، گوادر انٹرنیشنل ایئر پورٹ آن اندرون ملک و بیرون ملک جہاز آک چلینگرہ۔ وزیراعظم پارے کہ 1991ءٹی ہی گوادر نا اہمیت نا اندازہ مسوسس، دا کنا بھلو وخت اسے نا تغ اس ہرا الحمداللہ اینو پورو مرسا نظر بننگ ئِ ، اوٹی کیہی اڑاند آک بسر، اگہ ننا حکومت آتیٹی تسلسل سلیسکہ تو گوادر ہمہ وخت نا اسہ جدید و شون ہلوک شار اس جوڑ مسکہ۔ اوپارے کہ داسا داڑے امن اڈ ہلکونے ہنداخاطران پاکستان نا فوج ، پولیس و انتظامیہ تون اوار ، ہرافک ہم قربانی تسنو، نن اوفتا ستائِ کینہ، امن اڈتننگ کن ناصر جنجوعہ نا ہم بھلو کڑد اسے ہراتینا وخت و لائخی تے خڑچ کرے، خواری اٹ کاریم کرے اونا کوشست آک رنگ ایسور، اونا ایلو ٹیم ہم مبارکباد ناحقدار ئِ، گوادر مسکوہی ٹی پاکستان نا پسماندہ انگا وخت اس کہ داسا شون ہلوک شار ئِ۔ وزیراعظم پارے کہ چین، ہرا پاکستان نا ہمیش آن آزموندہ سنگت ئِ، نا کنڈآن پاکستان اٹی انفراسٹرکچر اٹی کمک آ منت واراُن۔ پاکستان اٹی بجلی نا پیداوار ، ریلوے اپ گریڈنگ، شاہراتی نیٹ ورک و اکنامک زون اٹی کمکاری آ چین نا بڑزکو سروک آتا ہم منت وار اُن، سی پیک ڈٹ ہڑتوم آ ملک آتے کن اہمیت نا حامل ئِ۔ وزیراعظم پارے کہ 2018ءٹی 10 ہزار میگاواٹ بجلی قومی گریڈ اٹی اوار مریک ہراڑآن ملک انا گرج آتے پورو کننگ اٹی کمک رسینگک۔ 2018ءٹی ملک آن لوڈشیڈنگ نا خاتمہ کن پراومیت ئِ۔ ملک اٹی ہائیڈل ، کولا، ایل این جی، ونڈ، سولر پاور پلانٹس آتیا کاریم جاری ئِ۔ اوپارے کہ گوادر پاکستان و پاکستان گوادر ئِ۔ گوادر اٹی 29 ارب روپئی نا خڑچ آن انٹرنیشنل ایئر پورٹ جوڑ جاڑ کننگ انگ ئِ ہرا اسہ پوسکن ئُ مثال اس مریک۔ گوادر ئِ ملک انا ایلو علاقہ غاتون ملفنگ کن 150 ارب روپئی نا خڑچ آن روڈ نیٹ ورک اس شاغنگ انگ ئِ۔ گوادر اٹی 150 کٹ آتا پوسکن ئُ ہسپتال اس جوڑ جاڑ کننگ انگ ئِ ہرادے گڈ اٹی 300 کٹ آتسکان دننگک۔ داڑے پرووکیشنل ٹریننگ سینٹر اس جوڑ کننگ انگ ئِ ، یونیورسٹی نا بنداو ئِ تخنگانے ہراڑآ 4ارب روپئی خڑچ بریک۔ ہنداخاطران فنڈز مہیا کننگ آ بنجائی وزیر ڈٹ بندی و شونتری احسن اقبال و ڈٹ اٹی است خواہی ہلسا اودے اولیتی بنداو تیا گڈیکو دروشم تننگ آ چیئرمین ہائیر ایجوکیشن کمیشن نا منت واراُن۔ وزیراعظم پارے کہ گوادر اٹی پنجا ہزار ملازمت میسر مریک، ہندی خلقت آتے ملازمت آتا فراوانی اولین اولیت مریک، دا ڈٹ آتے بروخت پورو کینہ۔ وزیراعظم پارے کہ پاکستان اٹی داوخت آ دہشت گردی سکرات آٹی ئِ ،بلوچستان امن نا جاگہ اس جوڑ مرسا کننگ ئِ، اللہ بد انگا نظر آن بچفتے۔ اینو داڑے ارب آ روپئی نا ڈٹ آک شروع ئُ۔ وزیراعظم پارے کہ اودے ہمو دے نظر بننگ ئِ ہراتم چین آن ٹریفک چلینگک و گوادر آ بریک و گوادر آن ٹریفک چین اسکان کاہک۔ نواز شریف پارے کہ اودے پاک چین سنگتی آ فخر ئِ و ہمیش دا کوشست مسنے کہ دا تعلقداری تے پین سوگو آن سوگو تر جوڑ کننگے ۔ پاکستان اٹی بجلی تنکی نا مون ئِ توننگ اٹی چین ناکمک مثالی ئِ۔ شاہراتی نیٹ ورک اٹی اونا بھلو کڑد اسے۔ ہڑتوم آملک آتا نیام اٹ سنگتی سیاسی کہول آن داسا اقتصادی کہول اٹی بدل مسنو۔ ہندا پائیدار سنگتی مریک۔ وزیراعظم پارے کہ گوادر اٹی پوسکنا ایئر پورٹ جوڑ مننگ ئِ، اینو داڑے بسٹ شار ئِ خناٹ کنے بھاز خوشی مس۔ ہندن لگاکہ کہ دا اسلام آباد نا شاہراک ئُ، 1991ءٹی گوادر نا حالیت بے کچ پسماندہ ئس۔ وزیراعظم پارے کہ کسس سجفنگ ہم کتوکہ کہ سمندر آن کنوئی آ صاف دیر داجاگہ نا خلقت آتے دستیاب مریک، داسا داڑے ڈیم جوڑ مننگ ئِ ہرافتے آن داڑے کشاری سرجزآتے ٹی ودکی مریک۔ داجاگہ نا ورنانسل حکومتی توجوہ و ڈٹ آتے خنسا خوشی اٹ سرشار مریک واہم ای اوفتے پاننگ خواوہ کہ دا توجوہ اینو نا آخا بلکن 90 ءنا دہائی نا ئِ۔ داڑے ڈغار نا نرخ آتیٹی ودکی شون نا نشانی ئِ۔ وزیراعظم وزیراعلیٰ ئِ پارت کرے کہ داڑے تجاوزات آتے توننگ کن گام گیج چست کننگے و ماسٹر پلان آ عملدرآمد ئِ باوری جوڑ کننگے۔ اوپارے کہ اومیت ئِ کہ گوادر ڈویلپمنٹ اتھارٹی ماسٹر پلان آ پورو عملدرآمد کرفک و اوناخلاف ورزی ئِ مننگ کن الیپنہ۔ اوچینی سفیر نا کنڈآن 600 ملین روپئی نا سکالر شپ نا پڑو آ اونا منت واری ئِ ادا کرے۔ اوپارے کہ اونا کمک ستاکڑزک اونا اخس کہ صفت ئِ کننگے کم ئِ، ہندا سچا انگا سنگت آتا پیدواری ئِ۔
