اسلام آباد۔ 01ستمبر (اے پی پی) وزیراعظم نا خصوصی کمکار خارجہ امور سرتاج عزیز پارینے کہ دنیا ٹی پاکستان ئِ تنیا کننگ نا ہیت آک محض پروپیگنڈہ ئُ۔ برطانوی نشریاتی ادارہ تون ہیت وگپ کرسا اوپارے کہ پاکستان جہانی کہول آ تینا درست جاگہ غا سلوک ئِ۔ اوپارے کہ پاکستان نا چین ، روس و دے ٹکی کہول اتون اوار ایلو ملک آتون گچین تعلقداریک استوار ئُ۔ کشمیر نا بابت ہیت وگپ کرسا اوپارے کہ کشمیری تے حق خودارادیت بایدے ملے کشمیر نا تحریک ئِ واک انا کمک اٹ توننگ مفک انتئے کہ دا تحریک اٹی کشمیری تا قربانیک اوارو۔ امریکہ تون اوار جہانی برادری نا کنڈآن مقبوضہ کشمیر اٹی مظالم نا مذمت آن بیدس صرف گڑتی نا درشانی ئِ کننگ آ مایوسی مسنے۔ امریکی وزیر خارجہ نا دورہ بھارت نا وخت آ بیان آتیا سلاہکار خارجہ نا پاننگ ئس کہ اوڑآن پاکستان نا بدنامی مفننگ ئِ۔ جان کیری ہراتم بھارت اٹی مریک تو پین بیان ایتک و اگہ او پاکستان اٹی مریک تو اونا بیان پین مریک۔ اوصفا کرے کہ پاکستان حقانی نیٹ ورک تون اوار غٹ گروپ آتا برخلاف بے پرخ کارروائی ئِ برجاتخانے ہندا سوب ئِ دہشت گردی نا برخلاف دوئی کروک سرسہبی تا دنیا نا کنڈآن ستا کننگ انگ ئِ۔ سرتاج عزیز نا پاننگ ئس کہ بھارت نا خوائش ئِ کہ پاکستان ئِ دا سرسہبی تا کریڈٹ ملپ۔ بھارت امریکہ تعلقداری تا بابت اوپارے کہ امریکہ نا پالیسی چین اناودوک آ اثر آتے توروئی ئِ ہرانا سوب بھارت و امریکہ نا نیام اٹ کمکاری ٹی ودکی مننگ ئِ۔
